Եթե Հայաստանի խորհրդարանն ընդունի «Հայաստանի Հանրապետության բնակչության սանիտարահամաճարակային անվտանգության ապահովման մասին» եւ հարակից օրենքներում փոփոխություններ եւ լրացումներ կատարելու մասին օրինագծերի փաթեթը, ապա հանրապետությունում ընտրություններ անցկացնելու սահմանափակումներ չեն լինի: Այս մասին NEWS.am-ի հետ զրույցում ասաց ՀՀ արդարադատության փոխնախարար Ռաֆիկ Գրիգորյանը:
Մասնավորապես, նա նշեց, որ օրենքի համաձայն, երկրում ընտրություններ անցկացնելու արգելքը մտցվում է միայն արտակարգ դրության դեպքում:
«Կարանտինի դեպքում նման սահմանափակումներ նախատեսված չեն»,- պարզաբանեց Գրիգորյանը:
Ճշտող հարցին` իսկ ի՞նչ կլինի այն դեպքում, եթե հանկարծ երկրում սանիտարահամաճարակային իրավիճակը վատթարանա եւ COVID-19-ով վարակվածների թիվը կտրուկ ավելանա, փոխնախարարը կրկնեց, որ ընտրությունները ոչ մի դեպքում չեն կարող չեղարկվել, քանի որ կարանտինի դեպքում որոշակի մեղմացումներ են մտցվում, իսկ իրավական բազան նման մեխանիզմներ չի նախատեսում:
