Իրանը մտադիր է սանկցիաներ կիրառել ԱՄՆ 26 ներկայացուցիչների նկատմամբ: «Սեւ ցուցակում» են հայտնվել այն չինովնիկները, ովքեր, Թեհրանի կարծիքով, մեղավոր են մարդկանց իրավունքների զանգվածային խախտումների եւ մարդկության դեմ գործած հանցագործությունների հարցում:

Ինչպես հայտնում է Mehr գործակալությունը, Իրանի խորհրդարանի ազգային անվտանգության եւ ներքին քաղաքականության հարցերի հանձնաժողովն այսօր երեկոյան կքննարկի ԱՄՆ 5 պաշտոնատար անձանց նկատմամբ սանկցիաների կիրառման հարցը: Նրանք են` ԱՄՆ Vincennes ռազմածովային ուժերի հրթիռային հածանավի ղեկավար Ուիլյամ Ռոջերսը, Գուանտանամոյի բանտի ղեկավար Ջեֆֆրի Հերբեսոնը, Իրաքի` 2003 թվականի քաղաքացիական վարչակազմի ղեկավար Պոլ Բրեմերը, ԱՄՆ պաշտպանության նախարարի նախկին խորհրդական Ռիչարդ Փերլը, Իրաքում եւ Աֆղանստանում ամերիկյան զինուժի ղեկավար Թոմմի Ֆրանքսը: