Շաբաթ օրը մոտ 1,5 հազար մարդ Ֆրանսիայի Նիս քաղաքում մասնակցել է հոկտեմբերի 30-ից մտցված կարանտինային միջոցառումների դեմ ցույցին, հաղորդում է ՏԱՍՍ-ը՝ վկայակոչելով ոստիկանության բաժանմունքին:
Բողոքի ցույցի մասնակիցների թվում են սրճարանների եւ ռեստորանների տերեր, հյուրանոցային բիզնեսի ներկայացուցիչներ, գործարարներ, որոնք դժգոհ են կորոնավիրուսի դեմ պայքարում իշխանությունների գործողություններից: Ցույցին մասնակցել են նաեւ «Դեղին ժիլետներ» շարժման ներկայացուցիչներ: «Մենք չենք կարող համաձայնել, որ կառավարությունը միակողմանի քայլեր ձեռնարկի՝ առանց տեղի բնակիչների հետ խորհրդակցելու»,- ասել է Նիս քաղաքի բարերից մեկի սեփականատերը:
Ցուցարարները իրավապահ ուժերի ուղեկցությամբ շարասյունով անցել են քաղաքի գլխավոր փողոցներով: Ոստիկանության փոխանցմամբ՝ գործողությունը տեղի է ունեցել առանց միջադեպերի:
Շաբաթ օրը ցույց է տեղի ունեցել նաեւ Մարսելում: Մի քանի հարյուր մարդ է մասնակցել բողոքի ցույցին, որը Բուշ-դյու-Ռոնի դեպարտամենտում կազմակերպվել է Փոքր եւ միջին ձեռնարկությունների միության խնդրանքով:
Ֆրանսիայում հոկտեմբերի 30-ից առնվազն մինչեւ դեկտեմբերի 1-ը կրկին ինքնամեկուսացման ռեժիմ է սահմանվել: Փակ են սրճարանները, ռեստորանները, բարերը, մարզադահլիճները, ակումբները, ոչ առաջնային ապրանքներ վաճառող խանութները: Կորոնավիրուսի տարածման ռիսկի պատճառով երկրում արգելվում է մարդկանց ցանկացած զանգվածային հավաքույթ: Կարանտինի կանոնները խախտելու համար տուգանքը 135 եվրո է:
Ըստ առողջապահական մարմինների վերջին տվյալների, Ֆրանսիայում հայտնաբերվել է COVID-19-ի ավելի քան 1,9 միլիոն դեպք: Մարտից զոհերի թիվը մոտ 44 000 է: