Հարավային Կորեայի մայրաքաղաքային շրջանում կարանտինի հինգ մակարդակներից երրորդ մակարդակ են սահմանել կորոնավիրուսով վարակման դեպքերի աճի ֆոնին: Այդ տարածաշրջանում արդեն գործում է երկրորդ կարանտինային մակարդակը, հաղորդում է ՏԱՍՍ-ը՝ հղում անելով երկրի առողջապահության նախարարությանը:
Նշվում է, որ այդ քայլն ուղղված է վիրուսի տարածման կանխմանը՝ դպրոցականների համար միասնական պետական քննության նախաշեմին, որը կկայանա դեկտեմբերի 3-ին:
Երրորդ մակարդակին համապատասխան արգելվում են մինչեւ 100 մարդու մասնակցությամբ հավաքները, ամբողջությամբ դադարեցվում է գիշերային ակումբների եւ մի շարք այլ հաստատությունների աշխատանքը: Ռեստորանները բաց կլինեն մինչեւ ժամը 21:00-ն: Ոչ մեծ սրճարաններին կթույլատրվի առաքումներ կատարել:
Հարավային Կորեայի առողջապահության նախարարության տվյալներով՝ վիրուսի ռեպրոդուկցիա ինդեքսն արդեն հասել է 1,5-ի: Եթե իրավիճակը չլավանա, ապա դեկտեմբերի սկզբին ամեն օր վարակման մոտ 600 նոր դեպք կհայտնաբերվի:
Նոյեմբերի 13-ին երկրում սկսել են տուգանել քաղաքացիներին հասարակական վայրերում եւ տրանսպորտում դիմակ չկրելու կամ սխալ կրելու համար: Տուգանքը կազմում է 100 հազար վոն (95 դոլար): Դիմակ կրելը պարտադիր է նաեւ վարակի տարածման բարձր ռիսկով աշխատավայրերում, մարզասրահներում, ինչպես նաեւ միջոցառումների ժամանակ, որտեղ ներկա է ավելի քան 500 մարդ: Ընդ որում, իշխանությունները քաղաքացիներին խորհուրդ են տալիս ընդհանրապես դուրս չգալ տնից առանց անհատական պաշտպանության միջոցների: