Եվրամիությունն ու Չինաստանը ավարտել են ներդրումային համագործակցության համապարփակ համաձայնագրի շուրջ բանակցությունները: Այս մասին չորեքշաբթի օրը հայտարարել է Եվրահանձնաժողովի նախագահ Ուրսուլա ֆոն դեր Լեյենը՝ ԵՄ-ի եւ Չինաստանի միջեւ տեսակոնֆերանսի ավարտից հետո, հայտնում է ՏԱՍՍ-ը:
«ԵՄ-ն ունի ամենամեծ միասնական շուկան աշխարհում: Մենք բաց ենք բիզնեսի համար, բայց հավատարիմ ենք փոխադարձությանը, հավասար պայմաններին եւ արժեքներին: Այսօր ԵՄ-ն եւ Չինաստանն ավարտեցին ներդրումային համաձայնագրի շուրջ բանակցությունները»,- գրել է նա իր Twitter-ում՝ ընդգծելով, որ գործարքը կնպաստի «առավել հավասարակշռված առեւտրին եւ գործարար հնարավորություններին»:
Ըստ «Սինհուա» գործակալության, համաձայնությունը ձեռք է բերվել չորեքշաբթի օրը կայացած տեսակոնֆերանսի արդյունքում, որն անցկացվել է Չինաստանի նախագահ Սի Ցզինպինի, Ֆրանսիայի նախագահ Էմանուել Մակրոնի, Գերմանիայի կանցլեր Անգելա Մերկելի, Եվրոպական խորհրդի նախագահ Շառլ Միշելի եւ Եվրահանձնաժողովի նախագահ Ուրսուլա ֆոն դեր Լայենի մասնակցությամբ:
ԵՄ-ն ու Չինաստանը ներդրումային համաձայնագրի շուրջ բանակցություններ են վարում 2013 թվականից: Ենթադրվում է, որ այն չինական շուկայում կբարելավի եվրոպացի ներդրողների համար պայմանները եւ կընդգրկի մի շարք առանցքային ոլորտներ, այդ թվում՝ ֆինանսներ, հեռահաղորդակցություն եւ էլեկտրամոբիլների արտադրություն: Այսպիսով, ՉԺՀ շուկա մուտքի ընդլայնման գործում եվրոպական բիզնեսը ավելի բարենպաստ պայմաններ կստանա, քան ամերիկյանը: