«Երկիր» միությունը բաց նամակ է հղել Գարեգին Բ կաթողիկոսին, կոչ անելով իր Վրաստան այցելության շրջանակներում ուշադրություն դարձնել ջավախահայերի խնդիրներին:
Նամակում, մասնավորապես, ասվում է.
«Հունիսի 10-15-ին Դուք միջեկեղեցական եւ հովվապետական այցով գտնվելու եք Վրաստանում՝ այցելելով նաեւ Սամցխե-Ջավախք-Ծալկա հայաբնակ տարածաշրջանը: Այցի ընթացքում Վրաստանի պատրիարք Իլիա Երկրորդի, նաեւ պետական բարձրաստիճան պաշտոնյաների, այդ թվում` նախագահ Մ. Սաակաշվիլիի հետ նախատեսված հանդիպումներում Դուք, անշուշտ, բարձրացնելու եք Վրաստանում հայ առաքելական եկեղեցու պաշտոնական կարգավիճակի ստացման, Ջավախքում ՀԱԵ առանձին թեմի բացման, Խորհրդային ժամանակաշրջանում հայ եկեղեցուց բռնագրավված կրոնական կառույցների վերադարձի, դրանց վերանորոգման ու վերաբացման հարցերը:
Սակայն ջավախքահայությանը մտահոգող են նաեւ այլ խնդիրներ: Վրաստանի իշխանությունները հետզհետե խստացնում են իրենց քաղաքականությունը վիրահայության եւ ջավախքահայության նկատմամբ: Վրացերենի իմացության բարելավման պատրվակով միջոցներ են ձեռնարկվում հայոց լեզուն հանրային կիրառությունից հանելու ուղղությամբ:
Այն ջավախքահայերը, որոնք փորձում են բողոքի ձայն բարձրացնել վրաց իշխանությունների խտրական քաղաքականության դեմ, ենթարկվում են հետապնդման:
Ջավախքահայության մեջ օր օրի արմատավորվում են վախի, անտարբերության եւ հիասթափության տրամադրությունները, որից ելքը ջավախքահայը տեսնում է սեփական հայրենիքից հեռանալու կամ էլ սեփական ինքնությունից հրաժարվելու եւ տիտղոսակիր ազգին ձուլվելու միջոցով: Այս գործընթացներն ուղղակիորեն վտանգում են Ջավախքի՝ որպես հայաբնակ տարածքի ապագան:
Ակնկալում ենք, որ Վրաստան Ձեր այցելության ժամանակ Դուք, հավատարիմ մնալով Հայոց եկեղեցու դարավոր ավանդույթներին, վրաց հոգեւոր եւ աշխարհիկ իշխանությունների առջեւ կբարձրացնեք հայաբնակ Ջավախքի ապագայի համար կենսական նշանակություն ունեցող վերոնշյալ բոլոր խնդիրները»:
