Հայաստանի երկրորդ նախագահ Ռոբերտ Քոչարյանի եւ մյուսների գործով դատախազները պատրաստվում են միջնորդություն ներկայացնել ՍԴ դիմելու մասին:
Ապրիլի 2-ի նիստում դատախազ Գեւորգ Բաղդասարյանը հայտնեց, որ իրենց պատրաստած միջնորդությունը առնչվում է գործի կասեցմանը եւ ՍԴ դիմելուն, նրանց կարծիքով՝ գործում կան Սահմանադրությանը հակասող նորմեր:
Ամենայն հավանականությամբ, դատախազները պնդելու են վերաորակել մեղադրանքը:
Սա արդեն երկրորդ դատական նիստն է Սահմանադրական դատարանի որոշումից հետո, որը ՔՕ 300.1-րդ հոդվածը ՀՀ Սահմանադրության 78 եւ 79-րդ հոդվածներին հակասող եւ անվավեր էր ճանաչել: Մարտի 25-ին ՍԴ-ն հրապարակել էր որոշման եզրափակիչ մասը, իսկ մարտի 29-ի երեկոյան՝ 42-էջանոց լրիվ տեքստը: ՍԴ որոշումը վերջնական է եւ ենթակա չէ բողոքարկման: ՍԴ-ն 300.1 հոդվածը համարել էր անորոշ իրավունքի եւ մեղսագրվող արարքի տեսակետից, պարզ չէ, թե ինչ կարգի տապալման մասին է խոսքը՝ հաշվի առնելով, որ հոդվածն ընդունվել է մի Սահմանադրությամբ, իսկ փորձել են կիրառել մեկ այլ Սահմանադրությամբ: Ռոբերտ Քոչարյանը, Յուրի Խաչատուրովը, Սեյրան Օհանյանը եւ Արմեն Գեւորգյանը մեղադրվում են հենց այդ հոդվածով՝ սահմանադրական կարգի տապալում: Փաստացի, դատարանը պետք է դադարեցնի այդ հոդվածով քրեական հետապնդումը վերը թվարկված անձանց, ինչպես նաեւ նմանատիպ մեղադրանքով այդ գործի շրջանակում անձանց նկատմամբ:
Հայտարարելով փաստաբանների միջնորդության քննարկման մասին՝ դատավոր Դանիբեկյանը հանկարծ մոռացավ նրանց մասին եւ դատախազներին դիմեց հարցով, թե ի՞նչ միջնորդություն են ներկայացնելու: Նիստում ընդմիջում է հայտարարվել, որպեսզի պաշտպանական կողմին տրամադրվի դատախազության միջնորդությունը: