Մոսկվան հայաստանյան ներքաղաքական դաշտում տեղի ունեցող գործընթացները դիտարկում է որպես ինքնիշխան երկրի ներքին գործ: Այս մասին հայկական «Նովոյե Վրեմյա» թերթին տված հարցազրույցում ասել է ՌԴ արտաքին գործերի փոխնախարար Անդրեյ Ռուդենկոն:
«Իհարկե, մենք չենք կարող անտարբեր մնալ բարեկամական երկրում տեղի ունեցող իրադարձությունների նկատմամբ: Մենք հանրապետության բոլոր քաղաքական ուժերին կոչ ենք անում զսպվածություն ցուցաբերել, որոնել ողջամիտ փոխզիջումներ` ի շահ հայ հասարակության համախմբման: Մենք հույս ունենք, որ նախընտրական շրջանում ամեն ինչ կանցնի խաղաղ, սահմանադրության շրջանակներում եւ կծառայի որպես ելակետ Հայաստանում երկարաժամկետ կայունության հասնելու համար»,-նշել է նա:
Ռուս դիվանագետը համաձայն չէ այն գնահատականների հետ, որ երկկողմ հարաբերությունները կորցրել են իրենց բնորոշ վստահությունը: «Մենք չենք կիսում նման գնահատականները: Մեր երկկողմ հարաբերությունները, որոնք ավանդաբար հիմնված են եղբայրական բարեկամության եւ փոխվստահության վրա, զարգանում են դինամիկ, տարբեր մակարդակներում եւ վեկտորներում՝ անկախ արտաքին եւ ներքին իրավիճակից: Միեւնույն ժամանակ, նույնիսկ օբյեկտիվորեն դժվար «քովիդային» տարում մեր կապերն ամրապնդվել են:
Ըստ հայկական կողմի՝ ռուսական կուտակված ներդրումները 2020 թվականի երրորդ եռամսյակի դրությամբ գերազանցել են 2,1 միլիարդ ԱՄՆ դոլարը կամ ընդհանուր օտարերկրյա ներդրումների 40%-ը: Դրանցից ուղղակի ներդրումներին բաժին է ընկնում 1,7 միլիարդ դոլար՝ ընդհանուր բաժնի 41,7%-ը:
Ռուսաստանը շարունակում է մնալ Հայաստանի առաջատար առեւտրային գործընկերներից մեկը ՝ ապահովելով հանրապետության արտաքին արտաքին առեւտրաշրջանառության գրեթե մեկ երրորդը:
2020 թվականին պանդեմիայի հետեւանքով երկու երկրների միջեւ ապրանքաշրջանառությունը փոքր-ինչ նվազել է: Բայց այդ անկումը դրամատիկ չէ:
«Հուսով ենք, որ համաճարակաբանական իրավիճակի կարգավորման արդյունքում կվերադառնանք կայուն աճի հետագծին: Քաղաքական երկխոսությունն ակտիվ զարգանում է: Հազիվ թե գտնվեն այլ երկրներ, որոնց ղեկավարները այսքան սերտ եւ արդյունավետորեն շփվում են: 2020 թվականին Վլադիմիր Պուտինը եւ Նիկոլ Փաշինյանը հեռախոսով զրուցել են ավելի քան 60 անգամ: 2021 թվականին մեր առաջնորդներն արդեն անցկացրել են 7 հեռախոսազրույց, իսկ հունվարի 11-ին՝ անձամբ հանդիպել են: Պարբերաբար կապեր են պահպանում կառավարությունների ղեկավարների, արտաքին գործերի եւ պաշտպանության նախարարների, ինչպես նաեւ մի շարք այլ գերատեսչությունների եւ կառույցների մակարդակով:
Ակտիվ աշխատում է Ռուսաստանի Դաշնության ՆԳՆ եւ ՀՀ ոստիկանության համատեղ կոլեգիան, Ռուսաստանի Դաշնության Դաշնային ժողովի եւ ՀՀ Ազգային ժողովի համագործակցության միջխորհրդարանական հանձնաժողովը, պարբերաբար անցկացվում է հայ-ռուսական միջտարածաշրջանային ֆորում:
Մեր դաշինքի անքակտելի մաս է համագործակցությունն ԱՊՀ, ԵՏՄ, ՀԱՊԿ հարթակներում, որտեղ մենք մեր հայ եւ այլ գործընկերների հետ միասին աշխատում ենք ընդհանուր շուկա ձեւավորելու ուղղությամբ»,-ասել է Ռուդենկոն:
