Չի կարելի Մարտի 1-ի գործն ամբողջությամբ լցնել մեկ կաթսայի մեջ, հակառակ պարագայում բորշչ կստացվի: Այս մասին «Ազատություն» ռադիոկայանին տված ֆեյսբուքյան հարցազրույցում նշեց Ռոբերտ Քոչարյանի պաշտպաններից Արամ Օրբելյանը:
Նրա խոսքով պետք է պահանջել, որ Հատուկ քննչական ծառայությունը 10 զոհերի մահվան հանգամանքներն առանձին-առանձին բացահայտի. «Մենք չենք կարող Մարտի 1-ի գործը բոլորը լցնենք մի կաթսայի մեջ ու ասենք՝ այ սա մի գործ է։ Էդ ժամանակ մենք ունենում ենք, կներեք, բայց բորշչ, կամ սոլյանկա։ Մենք պետք է ունենանք առանձին-առանձին էպիզոդներ և առանձին-առանձին քննենք։ Պետք է պահանջվի, որ Հատուկ քննչական ծառայությունը մահվան հանգամանքները առանձին-առանձին բացահայտի, մենք հիմա նույնիսկ պետք է չխմբավորենք տասը անձանց մահվան հանգամանքը որպես մի երևույթ, ինքը տասը առանձին երևույթ պետք է քննվի։
Մենք չպետք է ասենք՝ 186 անձի մարմնական վնասվածք, դա հակամարդկային է նայվում, որովհետև մենք մարդկանց սարքում ենք մի հատ խումբ ու ասում ենք՝ այ էս խմբի խնդիրը։ Ամեն մեկն ունի մահվան առանձին հանգամանք, ամեն մեկն ունի մարմնական վնասվածք ստանալու առանձին հանգամանք և հումանիստական մոտեցումը ենթադրում է ամեն մեկին ինդիվիդուալ մոտեցում և ամեն մեկի առանձին հանգամանքների պարզում», - նշեց նա:
Ավելի վաղ NEWS.am-ը հայտնել էր, որ ապրիլի 6-ին Երևանի ընդհանուր իրավասության առաջին ատյանի դատարանը արդարացրեց Մարտի 1-ի գործով երկրորդ նախագահ Ռոբերտ Քոչարյանին և նրա նախկին ենթականերին սահմանադրական կարգը տապալելու հոդվածով՝ հիմք ընդունելով ՍԴ որոշումը, որով 300.1 հոդվածը ճանաչվեց անվավեր եւ հակասահմանադրական:
