Հնդկաստանի արեւելքում Գանգես գետով տասնյակ դիակներ են լողում՝ երկրում կորոնավիրուսային վարակի կատաղի բռնկման դեմ պայքարի ֆոնին: Սակայն իշխանությունները հայտնել են, որ այդ մարդկանց մահվան պատճառները դեռ չեն պարզել, հաղորդում է CBS-ը:
Առողջապահության ոլորտի ներկայացուցիչները գետից 71 դի են դուրս բերել, հայտնել են Բիհարի նահանգի պաշտոնյաները: Գետում լողացող մարմինների լուսանկարները զայրույթ են առաջացրել սոցիալական ցանցերում եւ լուրեր են տարածվել, որ այդ բոլոր մարդիկ մահացել են COVID-19-ից: Երեքշաբթի իշխանությունները դիահերձում են անցկացրել, սակայն նշել են, որդիակների քայքայման պատճառով մահերի պատճառները չեն կարող հաստատել:
Դիակներ են հայտնաբերվել նաեւ հարեւան Ուտար-Պրադեշ նահանգի Գազիպուր գետում: «Մենք փորձում ենք պարզել, թե որտեղից են այդ դիակները եւ ինչպես են հայտնվել այստեղ»,- ասել է տեղացի պաշտոնյան:
Գազիփուրի մի բնակիչ հայտնել է, որ գյուղացիները բավարար քանակությամբ վառելափայտ չունեն՝ ցամաքում հանգուցյալներին դիակիզելու համար: «Վառելափայտի բացակայության պատճառով հանգուցյալները թաղվում են ջրի մեջ»,- ասաց նա:
Բիհարում եւ Ուտար Պրադեշում COVID-19-ով վարակման դեպքերի աճ է գրանցվել, քանի որ Հնդկաստանում վարակման դեպքերի թիվն ավելի արագ է աճում, քան աշխարհի ցանկացած այլ երկրում:
Երեքշաբթի երկրում հաստատվել է շուրջ 390.000 նոր դեպք, այդ թվում՝ 3876 մահվան դեպք: Հնդկաստանը հաստատված դեպքերի թվով երկրորդն է Միացյալ Նահանգներից հետո՝ շուրջ 23 միլիոն վարակման եւ ավելի քան 240 000 մահվան դեպք: Փորձագետներն ասում են, որ թվերը գրեթե հաստատ զգալի նվազեցված են:
