Պաղեստինի նախագահ Մահմուդ Աբբասը Իսրայելին մեղադրել է Գազայում «կազմակերպված պետական ահաբեկչության եւ ռազմական հանցագործությունների» մեջ, որոնք հետապնդվում են միջազգային իրավունքի համաձայն, հայտնում է AP-ն:
Նրա խոսքով՝ պաղեստինցիները «առանց տատանվելու միջազգային դատարաններում կհետապնդեն նրանց, ովքեր նման հանցագործություններ են կատարում»: Նա Իսրայելին «խաղաղ բնակիչների վրա դաժան հարձակումների եւ (բնակելի) տների միտումնավոր ռմբակոծությունների մեջ» է մեղադրել:
Իսրայելը հայտարարում է, որ հարվածներ է հասցնում միայն ռազմական թիրախներին եւ հնարավոր ամեն ինչ անում է խաղաղ բնակիչներին չվնասելու համար, այդ թվում՝ նախազգուշացնում է մարդկանց որոշ հարվածներից առաջ:
Այս տարի ավելի վաղ Միջազգային քրեական դատարանը սկսել էր հետաքննել 2014-ին Գազայի վերջին պատերազմի ընթացքում Իսրայելի եւ պաղեստինցի գրոհայինների կողմից հնարավոր ռազմական հանցագործությունները: ՄՔԴ-ը մտահոգություն է հայտնել նաեւ ռազմական գործողությունների վերջին փուլի կապակցությամբ: