ԱՄՆ-ն ուշադիր հետեւում է Վրաստանում տիրող իրավիճակին: Այս մասին հայտարարել է Պետդեպարտամենտի ներկայացուցիչ Նեդ Փրայսը, հաղորդում է «Նովոստի-Գրուզիա»-ն:
Պատասխանելով հարցին՝ արդյո՞ք ԱՄՆ-ն պատժամիջոցներ կկիրառի Վրաստանի ղեկավարության այն ներկայացուցիչների նկատմամբ, ովքեր հուլիսի 5-ին բռնություն են գործադրել, որի ընթացքում լրագրողներ են տուժել, նա նշել է. «Մենք ունենք մի քանի մեխանիզմ նրանց նկատմամբ, ով պատասխանատու է մարդու իրավունքների ոտնահարման եւ բռնության համար: Եվ պատժամիջոցներն իսկապես այդպիսի մեխանիզմներից մեկն են: Ինչպես գիտեք, մենք պատժամիջոցների մասին նախապես չենք խոսում, բայց ուշադիր հետեւում ենք իրավիճակին Վրաստանում»:
Նա նաեւ կոչ է արել Վրաստանի իշխանություններին հարգել ԼԳԲՏՔ համայնքի իրավունքները եւ պաշտպանել դրա ներկայացուցիչներին «բռնություններից, վիրավորանքներից, խտրականություններից եւ խարաներից»: «Ինչ վերաբերում է վարչապետին եւ նրա ապագային, ապա, իհարկե, այդ որոշումը պետք է կայացնի վրաց ժողովուրդը»,- եզրափակել է Փրայսը:
