Ազգային ժողովի փոխնախագահի պաշտոնում Իշխան Սաղաթելյանին չընտրելը իշխող քաղաքական ուժի կողմից քաղաքական հնարք, տրյուկ էր: Այս մասին NEWS.am-ի հետ զրույցում նշեց քաղտեխնոլորգ Արմեն Բադալյանը:
Անդրադառնալով նրան, որ իշխող ուժն առաջարկում էր ընդդիմադիր պատգամավորները չմասնակցեն քվեարկությանը, ՔՊ-ն իր կազմով կընտրի Իշխան Սաղաթելյանին, նա ասաց. «Սա եւս տրյուկ էր, որ տեսեք, դուք ի վիճակի չեք իրար մեջ լեզու գտնելու, մենք ենք ձեր թեկնածուին ընտրում. Սա ժողովրդական լեզվով ասած, հետո երեսով տալու համար էր արվում: Ըստ էության, ասում էին՝ Իշխան Սաղաթելյան, դու մեզ ես պարտական քո ընտրվելու համար: Բայց քանի որ ընդդիմությունը բավական փորձառու է, անմիջապես դա մերժեց եւ ասաց՝ դուք ոչ թե լավություն եք անում, որ հետո երեսով տաք, այլ պարտավոր եք, ձեր պարտքն եք կատարում: Այսինքն քաղաքական առեւտուրը չանցավ: Իշխող ուժը ուզում էր քաղաքական առեւտուր անել, բայց չստացվեց:
Իշխանությունը փորձում էր շատ պրիմիտիվ ձեւով կիրառել «Բաժանիր, որ տիրես» հնարքը, փորձում էր կասկածներ գցել, որ այդ 4 հոգին, որ չեն ընտրել «Պատիվ ունեմ»-ից է, որ չեն ուզում «Հայաստան» դաշինքի թեկնածուն անցնի, որ հետո իրենց թեկնածուն անցնի»:
Ինչ վերաբերում է նրան, որ ընդդիմությունը հայտարարում է, որ եկել է ԱԺ ոչ թե օրենսդրական աշխատանքով զբաղվելու, այլ իշխանություններին տապալելու համար, ինչ տարբերակներ կան տապալելու, Արմեն Բադալյանն ասաց. «Ցանկացած օրենքի նախագիծ, որ բերում է իշխանությունը, կարող են ջախջախիչ քննադատության ենթարկել, կարող են բազմաթիվ այլ գործընթացներ իրականացնել»:
Նա անդրադարձավ նաեւ տեսակետին, որ եթե ընդդիմությունը ԱԺ փոխխոսնակի թեկնածու չառաջադրեր, հնարավոր էր դրանով խորհրդարանում ճգնաժամ առաջացնել եւ ԱԺ-ն կլուծարվեր. «Ըստ Սահմանադրության, ԱԺ-ի երեք փոխնախագահներից մեկը պարտադիր պետք է լինի ընդդիմության թեկնածուն: Եթե ԱԺ-ն շարունակում է աշխատանքները եւ ԱԺ փոխխոսնակներից մեկը ընդդիմությունից չէ, ապա այդ պահից սկսած բոլոր օրենքները կարող են համարվել ոչ լեգիտիմ: Քանի որ դրանք սահմանադրական չեն, բոլորը կգնան ՍԴ եւ դրանով կապալեգիտիմացվի խորհրդարանը: Իսկ ապալեգիտիմ խորհրդարանը շատ ավելի հեշտ է տապալել»:
