Լատվիայի նախագահ Էգիլ Լեւիտսը Էստոնիայի նոր նախագահ Ալար Կարիսի հետ հանդիպումից առաջ COVID-19-ի էքսպրես-թեստ է հանձնել, եւ նրա մոտ հաստատվել է վարակի առկայությունը, տեղեկացնում է լատվիական ռադիոյի եւ հեռուստատեսության LSM.lv պորտալը։
«Պետության ղեկավար Էգիլ Լեւիտսը Էստոնիայի նոր նախագահ Ալար Կարիսի հետ հանդիպման նախօրեին COVID-19-ի էքսպրես-թեստ է հանձնել, եւ նրա մոտ հաստատվել է վարակի առկայությունը։ Ուստի, Կարիսին հոկտեմբերի 14-ի պաշտոնական այցի ժամանակ կհյուրընկալի սեյմի նախագահ Ինարա Մուրնիեցեն։ Լեւիտսը թեստը հանձնել է հոկտեմբերի 13-ի երեկոյան, Շվեդիայից վերադառնալուց հետո։ Այսօր նա ՊՇՌ թեստ կհանձնի, տեղեկացնում է նրա գրասենյակը»,- ասվում է հաղորդագրությունում։
Նշվում է, որ Լեւիտսն անձամբ հեռախոսով կապվել է էստոնացի պաշտոնակցի հետ, որի հետ հինգշաբթի պետք է հանդիպեր Ռիգայի ամրոցում։ Նա բացատրել է իրավիճակը եւ խնդրել հանդիպումը տեղափոխել այլ ժամանակ։ Կարիսը, որի համար այցը Լատվիա առաջին պաշտոնականն է նոր պաշտոնում, համաձայնել է հանդիպել սեյմի նախագահի հետ։
Ինչպես ավելացնում է պորտալը, նախօրեին Շվեդիայում Լեւիտսը հանդիպել էր Ռաուլ Վալենբերգի անվան Մարդու իրավունքների եւ հումանիտար իրավունքների ինստիտուտի ներկայացուցիչների հետ եւ քննարկել մարդու իրավունքների հարցերը։ Պաշտոնական այցելության ընթացքում նա նաեւ Մալմյոում մասնակցել էր Հոլոքոսթի հիշատակի միջազգային համաժողովին։ Ուրբաթ Լեւիտսը պետք է պաշտոնական հանդիպումներ ունենար Էստոնիայի վարչապետ Կայա Կալասի եւ Ռումինիայի նախագահ Կլաուս Յոհանիսի հետ։
