Սաակաշվիլին առաջարկում է իր ազատ արձակման համար նախաձեռնող խումբ ստեղծել, գրում է «Սպուտնիկ Գրուզիա»-ն։

Սաակաշվիլին պատիժ է կրում երկու քրեական գործով։ Ներկայումս նախկին նախագահը գտնվում է Թբիլիսիից ոչ հեռու գտնվող Գորի քաղաքի զինհոսպիտալում։ Նրան այնտեղ են տեղափոխել Թբիլիսիի բանտային հիվանդանոցից 50 օր հացադուլից հետո։ Սաակաշվիլիի ձերբակալությունից հետո Վրաստանում գրեթե ամեն օր ընդդիմության բողոքի ցույցեր են անցկացվում՝ նրան ազատ արձակելու պահանջով։

«Անվտանգության ծառայության տարածած սպեկուլյացիաները ցրելու, ինչպես նաեւ մանեւրելու համար ավելի շատ հնարավորություններ թողնելու համար․․․կարծում եմ, որ նախաձեռնող խումբը պետք է աշխատի իմ ազատ արձակման վրա»,-ասել է Սաակաշվիլին Վրաստանի ժողովրդին ուղղված իր ուղերձում։

Միաժամանակ, ինչպես նշել է նախկին նախագահը, գործող իշխանությունների դեմ պայքարի ամենաարդյունավետ միջոցը զանգվածային խաղաղ հանրահավաքներն են։ Նրանց, ովքեր չեն կարողանա ուղղակիորեն մասնակցել հանրահավաքներին, Սաակաշվիլին կոչ է արել ցուցարարներին օգնել սնունդով։      

Նրա խոսքով՝ իր ձերբակալությամբ իշխող «Վրացական երազանք» կուսակցության հիմնադիր Բիձինա Իվանիշվիլին փորձում է խոչընդոտել կոալիցիոն կառավարության ձեւավորումը։ 

«Հիշեցնեմ, որ ես ինձ չեմ տեսնում ապագա կառավարության ոչ մի կոնֆիգուրացիայի մեջ»,-հավելել է Սաակաշվիլին։

Միաժամանակ, նախկին նախագահը վստահ է, որ դատարանում արդարության հասնելու շանսեր չունի։ Նա ընդգծել է, որ չի վախենում «բաց ու հրապարակային ներկայանալ արդար դատավարության առջեւ, պաշտպանել իր ճշմարտությունը վրաց ժողովրդի առջեւ եւ հաղթել»։

Այնուամենայնիվ, նախկին նախագահը պահանջում է թույլ տալ իրեն ներկա գտնվել իր դատավարություններին, որտեղ նա «խոսելու է վրաց ժողովրդի հետ»։