ՌԴ Դաշնային խորհուրդը միաձայն վավերացրել է ԴԺՀ-ի եւ ԼԺՀ-ի հետ բարեկամության եւ համագործակցության մասին պայմանագրերը, տեղեկացնում է «ՌԻԱ Նովոստին»։
Նախատեսվում է, որ պայմանագրերը կկնքվեն 10 տարի ժամկետով՝ հինգ տարի ժամկետով ավտոմատ երկարացման հնարավորությամբ։
Հանրապետությունների սահմանների պաշտպանությունը, համաձայն պայմանավորվածությունների, կիրականացվի կողմերի համատեղ ջանքերով՝ ելնելով սեփական անվտանգության, ինչպես նաեւ խաղաղության եւ կայունության շահերից։
Նշվում է, որ պայմանագրերը նախատեսում են, որ կողմերը հաստատում են եւ հարգում միմյանց սահմանների ամբողջականությունն ու անքակտելիությունը։ Բացի այդ, Ռուսաստանի Դաշնությունն արդյունավետ միջոցներ կձեռնարկի ԼԺՀ-ի ֆինանսական եւ բանկային համակարգի պահպանման եւ գործունեության համար:
Համաձայնագրերը նախատեսում են, որ Ռուսաստանի Դաշնությունը եւ հանրապետությունները սերտորեն կհամագործակցեն միմյանց ինքնիշխանության եւ անվտանգության պաշտպանության հարցերում։
Նշվում է նաեւ, որ Ռուսաստանի Դաշնությունը եւ հանրապետությունները համատեղ կձեռնարկեն բոլոր հնարավոր միջոցները՝ վերացնելու խաղաղությանը սպառնացող վտանգը եւ հակազդելու իրենց դեմ ագրեսիայի գործողություններին։ Բացի այդ, պայմանագրերով կողմերին իրավունք է տրվում օգտվել իրենց տարածքում ռազմական ենթակառուցվածքներից եւ ռազմաբազաներից։
