Եվրոպան ճանաչում է ժողովուրդների ինքնորոշման իրավունքը, սակայն երեկ տեղի ունեցավ այն, ինչ տեղի ունեցավ։ Այս մասին փետրվարի 22-ին Երեւանում Եվրանեսթ խորհրդարանական վեհաժողովի իրավական հարցերի, մարդու իրավունքների եւ ժողովրդավարության հարցերով հանձնաժողովի նիստում հայտարարել է Եվրախորհրդարանի պատգամավոր, Ռումինիայի ներկայացուցիչ Դաչիան Չոլոշը։
«Այո, մենք ճանաչում ենք ժողովուրդների ինքնորոշման իրավունքը։ Այնուամենայնիվ, տեղի ունեցավ այն, ինչ տեղի ունեցավ։ Երեեկ նախագահ Պուտինը խոսեց Ռուսական կայսրության մասին, նախկին խորհրդային հանրապետությունների տարածքում Ռուսական կայսրության իրավունքների մասին։ Դա խելագարություն է, եւ ես կարծում եմ, որ կարեւոր է դա ընդգծել»,- ասել է Չոլոշը։
Պատգամավորը նշել է, որ այս փուլում պետք է հասկանալ՝ ի վիճակի է արդյոք ԵՄ-ն պաշտպանել իր արժեքները։ Դա, նրա խոսքով, վերաբերում է ոչ միայն ԵՄ անդամ երկրներին, այլեւ գործընկեր երկրներին։
Այս թեման, ինչպես կարծում է խորհրդարանականը, պետք է քննարկվի։
«Մենք պետք է խոսենք այդ մասին, այդ թվում՝ մեր հայտարարությունների շրջանակներից դուրս։ Կարո՞ղ ենք մեր գործընկերներին հատուկ աջակցություն տրամադրել: Տվյալ դեպքում նկատի ունեմ Ուկրաինային։ Կարո՞ղ ենք օգնել երկրներին ապահովել իրենց ինքնորոշումը»,-ասել է նա։
Նա նաեւ անդրադարձել է Ռուսաստանի դեմ պատժամիջոցների թեմային, ինչպես նաեւ այլ մեխանիզմներ քննարկելու անհրաժեշտությանը։ Դրանց միջոցով, ըստ Ռումինիայի ներկայացուցչի, Եվրոպան պետք է արձագանքի Կրեմլի երեկվա որոշմանը։