Առնվազն 16 սիրիական բնակավայր հայտնվել է թուրքական զորքերի եւ սիրիական զինված ընդդիմության ուժերի հրթիռակոծման գոտում Հալեպ նահանգի հյուսիսում, հայտնում է ՏԱՍՍ-ը՝ վկայակոչելով Firat գործակալությունը։
«Թուրքական հրետանին ծանր զինատեսակներից եւ ականանետերից 455 արկ է արձակել Մանբիջի եւ Աշ-Շեհբա շրջանների գյուղերի ուղղությամբ, նյութական վնաս է հասցվել խաղաղ բնակիչներին եւ անդերին»,- գործակալությունը մեջբերում է Մանբիջի պաշտպանության ռազմական խորհրդի հայտարարությունը, որը «Ժողովրդավարական Սիրիայի ուժեր» արաբա-քրդական կոալիցիայի մաս է կազմում:
Դրանում նշվում է, որ «Եփրատի վահան» թուրքամետ զինված խմբավորումները հարձակվել են տեղի զինյալների դիրքերի վրա եւ երեք անգամ փորձել գրավել Մանբիջից հյուսիս գտնվող Էլ-Մոհսենլի գյուղը։ «Դիմադրության մարտիկները հետ են շպրտել հակառակորդին եւ կորուստներ պատճառել վարձկանների ստորաբաժանումներին»,- ասվում է հայտարարության մեջ:
Թուրքիան վերահսկողության տակ է գտնվում Սիրիայի տարածքի 10 տոկոսը՝ 4.4 մլն բնակչությամբ։ Երեքշաբթի Թուրքիայի պաշտպանության նախարար Հուլուսի Աքարը հայտարարել էր, որ թուրքական բանակի նոր անդրսահմանային օպերացիան Սիրիայի հյուսիսում կսկսվի «ճիշտ ժամանակին եւ ճիշտ տեղում»։ Ինչպես հայտնում է Habertürk հեռուստաալիքը, սկզբնական փուլում դրա մասշտաբները կսահմանափակվեն Հալեպ նահանգի Թել-Ռիֆաաթ եւ Մանբիջ շրջաններով, ապա ռազմական գործողությունները կընդգրկեն Այն-էլ- Արաբը եւ Այն-Իսան։
