Սաուդյան Արաբիան հետաքրքրված է Ադրբեջանի հետ համագործակցության ընդլայնմամբ էներգետիկ ոլորտում։ Այս մասին հայտարարել է երկու երկրների համատեղ հանձնաժողովի համանախագահ Հալիդ Բին Աբդուլազիզ Ալ-Ֆալիհը՝ ելույթ ունենալով Ադրբեջան-Սաուդյան Արաբիա համատեղ հանձնաժողովի 7-րդ նիստում (Բաքու)։
Նա ընդգծել է, որ Էր Ռիադին, մասնավորապես, հետաքրքրում են Ադրբեջանում էլեկտրաէներգիայի արտադրության եւ արտահաման նախագծերը։
Ալ-Ֆալիհը հիշեցրել է, որ սաուդյան Acwa Power ընկերությունն Ադրբեջանում 240 Մվտ հզորությամբ քամու էներգիայի պարկի ստեղծման պայմանագիր է կնքել։ «Կարծում ենք, որ սաուդյան մյուս ընկերությունները նույնպես Ադրբեջանի հետ համագործակցելու հնարավորություն ունեն։ Այսօր վերականգնվող էներգիայի պոտենցիալն Ադրբեջանում կարելի է գնահատել ոչ թե մեգավատերով, այլ գիգավատերով»,- նրան մեջբերել է «Sputnik Азербайджан»-ը։
Նախարարը նշել է, որ սաուդյան ընկերությունները ցանկացել են մասնակցել Ադրբեջանից Եվրոպա էլեկտրաէներգիայի արտահանման գործընթացին։
Ադրբեջանի ֆինանսների նախարար Սամիր Շարիֆովն իր հերթին տեղեկացրել է, որ Սաուդյան Արաբիայի երկու հիմնական ֆոնդեր կարող են փող հատկացնել Արցախի օկուպացված տարածքների վերականգնման համար։
Նրա խոսքով՝ Ղարաբաղի վերականգնման եւ վերակառուցման գործընթացին հատկացվելիք միջոցները կարող են ներդնել Սաուդյան զարգացման ֆոնդը եւ Սաուդյան ներդրումային ֆոնդը։