Այս տարածաշրջանում խաղաղության հաստատումն անհնար է առանց Թուրքիայի։ Այս մասին Անկարայում լրագրողների հետ հանդիպման ժամանակ հայտարարել է Հայաստանի խորհրդարանի նախագահ Ալեն Սիմոնյանը։
Նա հույս է հայտնել, որ Թուրքիան կդիմի առարկայական քայլերի տարածաշրջանում խաղաղության հաստատման հարցում։
Միաժամանակ Սիմոնյանը վստահեցրել է, որ Հայաստանը տարածքային պահանջներ չունի Ադրբեջանի նկատմամբ։ «Մենք պատրաստ ենք եւ շահագրգռված ենք խաղաղության պայմանագրի ստորագրման հարցում։ Առեւտրի առումով տարածաշրջանի բացման հետ կապված մենք խնդիրներ չենք տեսնում։ Մարդկանց եւ ապրանքների տեղաշարժը Ադրբեջանից Նախիջեւան եւ Թուրքիա կարող է անարգել իրականացվել, իհարկե՝ հաշվի առնելով Հայաստանի օրենսդրությունն ու ինքնիշխանությունը»,- ասել է նա։
Նա հիշեցրել է, որ Հայաստանը մշտապես առաջարկել եւ առաջարկում է Ադրբեջանին հայելաբար դուրս բերել բոլոր զորքերը, որոնք ներկայումս գտնվում են սահմանին։