Կորոնավիրուսային համավարակի պատճառով ԱՄՆ-ի տնտեսությանը հասցված տնտեսական վնասը ներկայումս գնահատվում է մոտ 14 տրիլիոն դոլար։ 2020-ից 2023 թվականներին միայն քաղաքացիներին պատշաճ բժշկական օգնության ապահովման ուղղակի ծախսերը կազմել են մոտ 214 միլիարդ դոլար, հայտնում է ամերիկյան Los Angeles Times թերթը՝ հղում անելով սեփական հաշվարկներին։

«2020-ից 2023 թվականը ԱՄՆ-ի մաքուր տնտեսական արդյունքը կկազմի մոտ 103 տրլն դոլար։ Մեր վերլուծության համաձայն, եթե համավարկը չլիներ, այդ թիվը կկազմեր մոտ 117 տրլն դոլար։ Առողջապահության ուղղակի ծախսերն այս ժամանակահատվածում, հիմնականում պայմանավորված հոսպիտալացումներով, կազմել են մոտ 214 միլիարդ դոլար»,-նշվում է հոդվածում:

Միեւնույն ժամանակ, առողջապահական ծախսերի ծավալը կարող է տարբեր լինել՝ կախված ԱՄՆ-ում մահացության մակարդակից: Ամենալավատեսական տարբերակում, որը ենթադրում է, որ 2020 թվականի հունվարից մինչեւ 2022 թվականի հունիսը մահացել է 65 հազար քաղաքացի, ծախսերը կկազմեին մոտ 20 միլիարդ դոլար, իսկ վատագույն դեպքում (մարդկային կորուստներ՝ մոտ 2 միլիոն), այդ թիվը կաճեր մինչեւ 365 միլիարդ դոլար։