«Վրաստանի վերաքննիչ դատարանի որոշումը արդարադատության հեգնանք է, որով վրացական արդարադատությունը ցույց տվեց, թե վրացական իշխանությունների կամակատարն է»։ Այս մասին նոյեմբերի 2-ին լրագրողների հետ հանդիպմանը հայտարարեց «Երկիր» միության ծրագրերի պատասխանատու Ռոբերտ Թաթոյանը՝ անդրադառնալով Վրաստանի վերաքննիչ դատարանում ջավախահայ ակտիվիստ Վահագն Չախալյանի եւ նրա հարազատների նկատմամբ կայացրած վճռին:
Հիշեցնենք, որ ""Միասնական Ջավախք" ժողովրդավարական դաշինք" քաղաքական շարժման առաջնորդ Վահագն Չախալյանը 2009թ. ապրիլի 7-ին Ախալցխայի առաջին ատյանի դատարանի վճռով դատապարտվել է 10 տարվա ազատազրկման, իսկ հոկտեմբերի 29-ին Վրաստանի վերաքննիչ դատարանն անփոփոխ է թողել վճիռը։
«Երկիր» միության նախագահ Սեւակ Արծրունին ասաց, որ վճիռը բողոքարկելու համար այլ ատյաններ էլ են դիմելու, սակայն կարծում է, որ վրացական իշխանությունները արհամարհելու են այդ բողոքը։ «Մենք Վրաստանի իշխանություններից ոչինչ չենք սպասում»,- նշեց նա:
Ինչ վերաբերում է Չախալյանի հարցը պաշտոնական մակարդակով քննարկելուն, Արծրունին ասաց, որ ՀՀ նախագահ Սերժ Սարգսյանի սեպտեմբերի 1-ի ջավախահայության եւ վիրահայության խնդիրներին վերաբերող հայտարարությամբ, կարծես թե այդ հարցն արդեն բարձրացվել է եւ պահանջները դրվել:
Հիշեցնենք նաեւ, որ Չախալյանի հայրը եւ եղբայրն էլ իրենց քաղաքական հայացքների համար ենթարկվել էին 5,000 (շուրջ 3,000 ԱՄՆ դոլար) եւ 2,000 լարի տուգանքի (շուրջ 1,200 ԱՄՆ դոլար):
