2023 թվականի նոյեմբերի 15-ին Մինսկում տեղի ունեցան միջԱԳՆ խորհրդակցություններ «ԱՊՀ անդամ երկրների և ԵԱՀԿ-ի համագործակցության մասին, ինչպես նաև Եվրամիության, ՆԱՏՕ-ի և այլ բազմակողմ եվրոպական կազմակերպությունների հետ փոխգործակցության շուրջ» թեմայով։
Միջոցառմանը մասնակցել են Ադրբեջանի, Հայաստանի, Բելառուսի, Ղազախստանի, Ղրղզստանի, Ռուսաստանի, Տաջիկստանի, Թուրքմենստանի, Ուզբեկստանի և ԱՊՀ գործադիր կոմիտեի ներկայացուցիչները, հայտնում է ԱՊՀ գործադիր կոմիտեն։
«Խորհրդակցությունների ընթացքում արտաքին քաղաքականության գերատեսչությունների ներկայացուցիչները գնահատականներ են փոխանակել ԵԱՀԿ-ում իրավիճակի վերաբերյալ, քննարկել են Համագործակցության անդամ երկրներում այս կազմակերպության նախագծային ու դաշտային գործունեությունը և նշել, որ անհրաժեշտ է համատեղ պայմաններ ստեղծել Եվրատլանտյան երկրներում ռազմաքաղաքական իրավիճակի դեէսկալացիայի համար»,- նշվում է հաղորդման մեջ։
Հանդիպման մասնակիցները պայմանավորվել են շարունակել դիրքորոշումների համակարգումը 2023 թվականի նոյեմբերի 30-ից դեկտեմբերի 1-ը Սկոպյեում ԵԱՀԿ արտգործնախարարների խորհրդի նիստի նախապատրաստման և անցկացման ընթացքում։ Միաժամանակ ընդգծվել է առաջիկա միջոցառմանը մասնակից բոլոր պետությունների պատվիրակությունների անարգել մուտքի ապահովման կարևորությունը։
Խորհրդակցությունների ընթացքում քննարկվել են նաև Եվրամիության ներկայիս քաղաքականությունը ԱՊՀ տարածքում և Համագործակցության երկրների հարաբերությունները ՆԱՏՕ-ի հետ։
