Փետրվարի 2-ին՝ լուսադեմին, Իսրայելը մի քանի հարված է հասցրել Դամասկոսի հարավին, հարձակումը հետ է մղվել սիրիական հակաօդային պաշտպանության ուժերի կողմից, տուժածներ չկան։ Այս մասին հայտնում է սիրիական Al-Ikhbariya հեռուստաալիքը՝ հղում անելով Սիրիայի պաշտպանության նախարարության աղբյուրին։
«Այսօր առավոտյան մոտավորապես ժամը 4:20-ին իսրայելական թշնամին ավիահարված է հասցրել սիրիական օկուպացված Գոլանից՝ հարվածներ հասցնելով Դամասկոսի հարավում գտնվող մի շարք վայրերի։ Մեր ՀՕՊ համակարգերն ագրեսիային պատասխանել են հրթիռներով և խոցել դրանցից մի քանիսը, կորուստները սահմանափակվել են նյութական վնասով»,- նշել է աղբյուրը, փոխանցում է РИА Новости-ն։
Իսրայելի և պաղեստինյան ՀԱՄԱՍ շարժման միջև ռազմական գործողությունների սկսվելուց ի վեր իսրայելական ինքնաթիռները պարբերաբար հարվածներ են հասցնում Սիրիայում: Նախկինում Իսրայելը գնդակոծել էր Դամասկոսի և Հալեպի օդանավակայանները՝ դրանք որոշ ժամանակով շարքից հանելով։