Կոնվերս Բանկը 2-3 տարվա ընթացքում ձևավորել է մոտ 5 մլրդ դրամի պորտֆել, որը վերաբերում է բնապահպանական, սոցիալական և կառավարման խնդիրների լուծմանը (ESG): Այս մասին մարտի 6-ին «Կայուն զարգացում և ԷՍԳ. միջազգային օրակարգ և տեղական կարիքներ» թեմայով համաժողովի ժամանակ ասաց Կոնվերս Բանկի գործառնությունների դեպարտամենտի տնօրեն Արթուր Մխիթարյանը։
Նա պարզաբանեց, որ բանկը ֆինանսավորել է առաջին ֆոտովոլտային կայանի ծրագիրը, ակտիվ մասնակցություն ունի էներգաարդյուն հիփոթեքի ոլորտին, մասնակցում է կայուն զարգացմանը միտված լիզինգի ֆինանսավորմանը և գյուղատնտեսության վարկավորմանը:
«Մենք հասել ենք նրան, որ քաղաքացին, տանը նստած, կարող է դառնալ մեր հաճախորդը, նա կարիք չունի բանկերի մասնաճյուղեր այցելելու։
Բացի այդ, իրականացվում է օպտիմալացում եւ բարձրանում է բիզնես գործընթացների արդյունավետությունը:»,- ընդգծեց նա։
Մխիթարյանը հավելեց, որ օպտիմալացման արդյունքում բանկի աշխատակիցներն իրենք են դառնում բիզնես գործընթացի կառավարիչներ, ինչը նրանց հնարավորություն է տալիս ավելի արդյունավետ օգտագործել ստեղծագործական ներուժը։
Նրա խոսքով, 2020 թվականը բիզնեսին ստիպեց ավելի արդյունավետ միջոցներ փնտրել գործունեության կազմակերպման համար։ Կոնվերս Բանկի գործառնությունների դեպարտամենտի տնօրենը նշեց, որ անկայուն ժամանակներում ամենաակտիվ միջոցներն են ձեռնարկվում ոչ ստանդարտ լուծումներ գտնելու համար, որոնք ավելի արդյունավետ և հարմար կլինեն հաճախորդների և ընդհանրապես հասարակության համար:
«Միայն տնից և միայն աշխատավայրում աշխատելը ծայրահեղություններ են։ Վերջին տարիներին ձևավորելով նաև հեռավար աշխատանքի կազմակերպման փորձառություն՝ բիզնեսն այժմ կարող է որոշել, թե որ տեսակն է օգտագործելու կամ այդ երկուսի ինչպիսի համադրությունն ավելի հարմար կլինի։ Այս բոլոր գործընթացները հանգեցրել են նրան, որ ամբողջ աշխարհում բիզնեսի նկատմամբ վստահությունը բարձրացել է։ »,- եզրափակեց նա։
