Ադրբեջանցի պատգամավոր, քաղաքագետ Ռասիմ Մուսաբեկովն ազդարարել է Տավուշում Ադրբեջանի «ռազմական գործողության» հնարավորությունը։ Մուսաբեկովն իր գաղափարը հնչեցրել է Vesti. Az-ի հարցազրույցում։
Մեծ հարցազրույցը նվիրվել է Հայաստանին Ադրբեջանի ներկայացրած պահանջներին Տավուշի մարզի գյուղերը հանձնելու, հայ-ռուսական հարաբերությունների եւ հնարավոր զարգացումների վերաբերյալ։
Պարզ չէ՝ արդյո՞ք միտումնավոր է Մուսաբեկովը ձեւացնում, թե՞ անկեղծորեն մոլորված է, բայց կիրառում է ակնհայտորեն ոչ ստույգ տեղեկություններ, համապատասխանաբար, սխալ եզրակացությունների հանգելով։
Պատգամավոր-քաղաքագետը, ի թիվս այլ հարցերի, ազդարարում է հերթական ագրեսիայի հնարավորությունը, հավանաբար որպեսզի յուղ լցնի տավուշցիներին ահաբեկելու ջրաղացը։
Հավաստիացնելով, որ Մոսկվան մատն էլ չի շարժի Հայաստանին օգնելու համար, «իսկ Բրյուսելը եւ Վաշինգտոնը խորհուրդ չեն տվել հարցը հասցնել հերթական ռազմական բախման Ադրբեջանի հետ եւ խաղաղությամբ վերադարձնել տարածքը նրա օրինական տիրոջը», Մուսաբեկովը եզրակացնում է. «Սահմանամերձ ադրբեջանական գյուղերի դեօկուպացիան պետք է տեղի ունենա կարճ ժամկետում։ Հայերի ընտրությունը միայն այն է որ դա անեն խաղաղ կամ մեր կոմանդոսների ուժային գործողության արդյունքում»։
Հիշեցնենք, որ գյուղերի հարցը քննարկվում է սահմանազատման դեռեւս չսկսված գործընթացի շրջանակից դուրս։
