Եթե առաջիկայում գործարար Սիլվա Համբարձումյանին ապտակելու համար Սյունիքի մարզպետ Սուրեն Խաչատրյանի դեմ հարուցված եւ կարճված գործի, ինչպես նաեւ Ս. Համբարձումյանի հանքից կորած գործիքի (նա դրանում եւս մեղադրում է Սուրեն Խաչատրյանին) գործերի զարգացումները չբավարարեն կին գործարարին, նա երկու գործով էլ կդիմի Եվրոպական դատարան: Այս մասին NEWS.am-ը թղթակցի հետ զրույցում տեղեկացրեց գործարար Սիլվա Համբարձումյանը, ով ներկա պահին գտնվում է Իրանում: Վերջինս պատասխանեց եւս մի քանի հարցերի, որը ներկայացնում ենք ստորեւ:
Տիկին Համբարձումյան, Դուք մեզ հետ զրույցում նշել էիք, որ Ձեզ բավարարել է Սյունիքի մարզպետ Սուրեն Խաչատրյանի ներողությունը: Այդ դեպքում, ինչո՞ւ բողոքարկեցիք Ձեզ ապտակելու գործը կարճելու դատախազության որոշումը:
Դատախազը բողոքը կարճել է, հետեւաբար նորից բողոքարկում ենք:
Հասկանալի է, իսկ, եթե ներել էիք Սուրեն Խաչատրյանին ինչո՞ւ դիմեցիք այդ քայլին:
Լկտիացել էր, դրա համար էլ դիմեցինք այդ քայլին:
Այսինքն` շարունակում էր սպառնալիքնե՞ր հնչեցնել ձեր հասցեին:
Ոչ, չի սպառնացել, բայց ես արդեն դիմել եմ օրենքին: Օրինակ, երբ ուրիշ մեկը նման քայլի է դիմել, նրան բանտարկել են: Այս դեպքում ինչո՞ւ Սուրեն Խաչատրյանը պետք է չպատժվեր:
Տիկին Համբարձումյան, Դուք նաեւ Եվրադատարանով եք սպառնում: Բայց կոնկրետ Եվրադատարան պատրաստվում եք դիմել ապտակի՞, թե՞ Ձեր հանքի կորած գործիքի համար, որում նույնպես մեղադրում եք Սուրեն Խաչատրյանին:
Եթե առաջիկայում այս երկու գործերի զարգացումները Հայաստանում ինձ չբավարարեցին ես երկու գործով էլ գնալու եմ Եվրադատարան:
Վերջերս Իրանում նոր հանք բացեցիք: Արդյոք դա նշանակո՞ւմ է, որ հիասթափվել եք Հայաստանից եւ ցանկանում եք Ձեր բիզնեսը տեղափոխել արտերկիր:
Այն, որ հիասթափված եմ դա հաստատ է, բայց չեմ պատրաստում հրաժարվել իմ հայաստանյան բիզնեսից, որովհետեւ դա իմ երկիրն է: Իսկ ինչ վերաբերում է տեղի եւ արտերկրի բիզնեսներին, ապա դրանք բազմաթիվ են:
Իսկ հրաժարվե՞լ եք արդյոք թիկնապահի ծառայությունից, թե` ոչ:
Ոչ, ապահովության համար դեռեւս շարունակում եմ օգտվել թիկնապահի ծառայությունից:
Ավելի վաղ NEWS.am-ը հայտնել էր, որ ՀՔԾ-ում հարուցվել է քրեական գործ՝ քաղաքացի Սիլվա Համբարձումյանից ստացած գրավոր հաղորդման հիման վրա, ըստ որի Սյունիքի մարզպետ Սուրեն Խաչատրյանը, նոյեմբերի 14-ին, «Արմենիա-Մարիոթ» հյուրանոցում հարվածներ է հասցրել իրեն: «Ես գոհ եմ գործից, որովհետեւ ինքը վերջ ի վերջո զղջաց: Ես կարծում եմ, որ երբեւէ, էլ չեմ հանդիպի իր հետ: Ավելին` չէի էլ ուզում, որ Սուրեն Խաչատրյանն անձամբ ինձանից ներողություն խնդրեր: Նա պետք է իր մոտ ընկերների միջոցով դա աներ եւ երբ այդ մասին լրագրողներին ասեի ասելու էր, որ ես նման բան չեմ ասել: Հետեւաբար` ես այս տարբերակից շատ գոհ եմ»,- NEWS.am-ի հետ զրույցում նշել էր Սիլվա Համբարձումյանը հավելելով, որ չի բողոքարկի ՀՔԾ որոշումը: Հիշեցենք նաեւ, որ դեկտեմբերի 13-ին Հայաստանի հատուկ քննչական ծառայությունը կարճել է Սյունիքի մարզպետ Սուրեն Խաչատրյանի կողմից գործարար Սիլվա Համբարձումյանին հարվածելու փաստով հարուցված քրեական գործը: ՀՔԾ լրատվական բաժնից հայտնում են, որ ավարտվել է ՀՀ քրեական օրենսգրքի 118-րդ հոդվածով (Ծեծ) հարուցված քրեական գործի նախաքննությունը: Նախաքննությամբ հիմնավորվել է, որ տեւական ժամանակ Սուրեն Խաչատրյանի եւ Սիլվա Համբարձումյանի միջեւ ձեւավորվել են անբարյացակամ հարաբերություններ: «Արմենիա-Մարիոթ» սրճարանում նշված անձանց միջեւ ծագած վեճի ընթացքում մարզպետը մեկ անգամ ձեռքով հարվածել է (ապտակել) Ս.Համբարձումյանին: Նշված հանգամանքը հիմնավորվել է նախաքննությամբ ձեռք բերված ապացույցներով, այդ թվում՝ ականատես վկաների ցուցմունքներով, միջադեպի տեսագրությամբ, ինչն առգրավվել եւ կցվել է քրեական գործին: Սիլվա Համբարձումյանի ցուցմունքի համաձայն՝ Սուրեն Խաչատրյանի ապտակից մարմնական վնասվածքներ չի ստացել եւ հրաժարվել է դատաբժշկի ուղեգրից, իսկ Սուրեն Խաչատրյանն իր ցուցմունքում հայտնել է, որ զղջում է կատարածի համար: Տվյալ պարագայում վերը հիշատակված արարքն իր մեջ չի պարունակում ՀՀ քրեական օրենսգրքի 118-րդ հոդվածով նախատեսված հանցագործության օբյեկտիվ կողմը կազմող գործողություն, այն է՝ ծեծի հատկանիշներ՝ իր եզակիության եւ նվազ կարեւորության պատճառով, քանի որ քրեական իրավունքի տեսությունում «ծեծել» ասելով հասկացվում է ֆիզիկական ցավ պատճառելուն ուղղված բազմաթիվ հարվածներ հասցնելը: Ձեռք բերված ապացույցների հիման վրա դեկտեմբերի 12-ին որոշում է կայացվել քրեական գործով վարույթը կարճելու մասին:
Ի դեպ, սույն գործով հարուցված քրեական գործը կարճելու` Հատուկ քննչական ծառայության որոշման դեմ Սիլվա Համբարձումյանի առաջին բողոքը մերժվել է: Գլխավոր դատախազը բողոքը վերահասցեագրել է գործի նախաքննության նկատմամբ վերահսկողություն իրականացնող դատախազին, վերջինս էլ եզրակացրել է, որ նորմալ քննություն է ընթացել, որոշումը օբյեկտիվ է, իսկ Սիլվա Համբարձումյանի բողոքն անհիմն է: Տուժող կողմը պատրաստվում է նոր բողոք ուղարկել գլխավոր դատախազ Աղվան Հովսեփյանին, իսկ մերժում ստանալու դեպքում դիմելու է դատարան:
Զրուցեց Տաթեւ Մեսրոպյանը