Օրերս լրագրողների հետ հանդիպման ժամանակ Հայկական ճարտարապետությունն ուսումնասիրող հասարակական կազմակերպության նախագահ Սամվել Կարապետյանը համոզմունք էր հայտնել, որ Թբիլիսիի Մուղնեցոց Սուրբ Գեւորգ փլուզված եկեղեցին, վերականգնել, գործնականում, այլեւս անհնարին է։ Նա, որպես իր ասածի վկայություն, նշել էր հուշարձանի աղյուսաշեն, եւ ոչ քարաշեն լինելու փաստը։
Պարզելու համար, թե ՀՀ մշակույթի նախարարությունը ի՞նչ դիրքորոշում ունի այս հարցի առնչությամբ եւ կիսո՞ւմ է արդյոք Ս. Կարապետյան կարծիքը, NEWS.am-ի թղթակիցը զրուցեց նույն նախարարության Պատմության եւ հուշարձանների պահպանության գործակալության պետ Արթուր Գրիգորյանի հետ։
Նշելով, որ եկեղեցու վերականգնումը լիովին հնարավոր է, եւ իրենք չեն կիսում Սամվել Կարապետյանի համոզմունքը, ոլորտի ներկայացուցիչը ավելացրեց, որ այդ աշխատանքների ժամանակ, հնարավոր է անգամ, օգտագործվեն հենց նույն հուշարձանի աղյուսները. «Կասկածել եւ վախենալ պետք չէ. նախարարությունն ունի այդ եկեղեցու բոլոր չափագրությունները եւ լուսանկաները։ Բացի այդ, մենք Թբիլիսի ենք գործուղել համապատասխան մասնագետի, ով, մի քանի օրից վերադառնալով Հայաստան, կներկայացնի այնտեղ տիրող իրավիճակը»,-նշեց Ա. Գրիգորյանը։
Հարցին, թե ՀՀ մշակույթի նախարարությունն, առհասարակ, ի՞նչ քայլեր է, ձեռնարկում վիրահայոց թեմի մյուս եկեղեցիները կործանումից փրկելու ուղղությամբ, գործակալության պետը նկատեց, որ հայկական կողմը բազմիցս փորձել է բանակցել վրացական իշխանությունների հետ, սակայն՝ ապարդյուն։ «Երեք տարի առաջ, երբ վրացական կառավարության պատվիրակությունը Հայաստանում էր, նրանք պարզապես հրաժարվեցին ստորագրել մշակութային մի պայմանագիր, որով պարտավորվում էին պահպանել իրենց երկրի տարածքում եղած հայկական հուշարձանները»,- տեղեկացրեց նա։
Հիշեցնենք, որ մի քանի օր առաջ Հայկական ճարտարապետությունն ուսումնասիրող հասարակական կազմակերպության նախագահ Սամվել Կարապետյանը մամուլի ասուլիսի ժամանակ հայտարարել էր, որ «Թբիլիսիի Մուղնեցոց Սուրբ Գեւորգ եկեղեցու փլուզումն ամենեւին էլ անսպասելի չէր, դրա փլուզումն սպասվում էր ամեն օր, եւ այն վերականգնել, այլեւս, անհնար է»: