նախընտրելի դարձնել
«Էդուարդ» տրոպիկական փոթորիկը երեքշաբթի օրը առատ անձրևներ է բերել Տեխասի և Լուիզիանայի որոշ հատվածներում՝ շարժվելով դեպի Մեքսիկական ծոցի ափամերձ շրջաններ, հայտնում է Associated Press-ը։
ԱՄՆ Փոթորիկների հետևման ազգային կենտրոնը նախազգուշացրել է ջրհեղեղների ռիսկի մասին և հայտնել, որ փոթորիկը կարող է զգալիորեն ուժգնանալ՝ հասնելով մինչև փոթորկաբեր ուժի։
«Էդուարդը» գտնվել է Տեխասի Փորթ Արթուր նավահանգստային քաղաքից մոտ 35 կմ հարավ-արևելք՝ Լուիզիանայի սահմանից և փոթորկի՝ ցամաք դուրս գալու հավանական շրջանից ոչ հեռու։ Քամու կայուն արագությունը հասնում էր 85 կմ/ժ-ի։
Օդերևութաբանները սպասում էին, որ «Էդուարդը» Տեխասի ափ դուրս կգա երեքշաբթի, որից հետո արագ կթուլանա։ Միևնույն ժամանակ, իշխանությունները նախազգուշացնում էին առաջին հերթին ջրածածկումների վտանգի մասին։
Մրրիկների հետևման ազգային կենտրոնի կանխատեսումներով՝ Տեխասի ափամերձ հատվածում և նահանգի կենտրոնական մասում կտեղա 8-15 սմ տեղումներ, իսկ առանձին շրջաններում՝ մինչև 23 սմ։ Լուիզիանայի հարավ-արևմուտքում տեղումների քանակն ավելի քիչ կլինի։
«Այս տեղումները կարող են հանգեցնել հանկարծահաս ջրհեղեղների և գետերի վարարման», — հայտարարել է Մրրիկների հետևման ազգային կենտրոնի ավագ մասնագետ Բրեդ Ռայնհարթը։
Տեխասի նահանգապետ Գրեգ Էբոթը նույնպես ջրհեղեղներն անվանել է փոթորկի հետ կապված գլխավոր սպառնալիքը։ Նահանգի իշխանությունները նախապես մաքրել էին չոր բուսականությունը, որը կարող էր բռնկվել կայծակի հարվածից և նպաստել հրդեհների արագ տարածմանը։
Զուգահեռաբար Խաղաղ օվկիանոսում ձևավորվել են միանգամից մի քանի տրոպիկական համակարգեր։
«Լոուել» մրրիկը երեքշաբթի առավոտյան գտնվում էր Հավայի նահանգի Հիլո քաղաքից մոտ 925 կմ հարավ-արևելք ընկած տարածքում։ Քամու կայուն արագությունը հասնում էր 130 կմ/ժ-ի։ Օդերևութաբանները սպասում էին, որ առաջիկա օրերին այն կմնա Հավայան կղզիներից մի քանի հարյուր կիլոմետր հեռավորության վրա, սակայն արդեն չորեքշաբթի օրվանից կղզիներում ալիքները կարող էին ուժեղանալ։ Մասնագետները նախազգուշացրել են լողալու և նավագնացության համար վտանգավոր պայմանների մասին։
Խաղաղ օվկիանոսում ձևավորվել է նաև «Մարի» տրոպիկական փոթորիկը։ Այն գտնվում էր Մեքսիկայի Մանսանիլյո քաղաքից մոտ 643 կմ հարավ-արևմուտք և շարժվում էր դեպի հյուսիս-արևմուտք։ Քամու արագությունը հասնում էր 72 կմ/ժ-ի։ Կանխատեսումների համաձայն՝ «Մարին» պետք է աստիճանաբար ուժեղանար և չորեքշաբթի երեկոյան հասներ մրրիկի ուժգնության։
«Կարինա» մրրիկը, որը կիրակի հասել էր մրրիկի ուժգնության, երկուշաբթի օրը ուժեղացել էր՝ հասնելով չորրորդ կարգի, սակայն երեքշաբթի սկսել էր թուլանալ։ Այն գտնվում էր Մեքսիկայի Ստորին Կալիֆոռնիա թերակղզու հարավային ծայրակետից մոտ 2060 կմ արևմուտք-հարավ-արևմուտք ընկած տարածքում և վտանգ չէր ներկայացնում ցամաքի համար։ Քամու արագությունը հասնում էր 222 կմ/ժ-ի։
Այդ ընթացքում «Դոլի» տրոպիկական փոթորկի մնացորդները անձրևներ ու ամպրոպներ են բերել Հայիթի և Դոմինիկյան Հանրապետություն, ինչպես նաև Թերքս և Քայքոս ու Բահամյան կղզիներ։
