Երկար տարիներ շրջանառվում էին լուրեր, թե Ադոլֆ Հիտլերը մտերմիկ կապ է ունեցել իր զարմուհի Գելի Ռաուբալի հետ, որը մահացել է ընդամենը 23 տարեկանում։

95 տարի շարունակ համարվում էր, որ Գելին ինքն է կրակել իր կրծքին՝ փորձելով փրկվել դժբախտ կյանքից, որտեղ քեռին վերահսկում էր նրա գրեթե յուրաքանչյուր քայլը։

Սակայն այժմ պատմաբանները հարց են բարձրացնում՝ արդյոք Հիտլերի վերահսկողությունը ավելի հեռու չի՞ գնացել, և հենց ինքը չի՞ արդյոք 1931 թվականին Մյունխենում արձակել մահաբեր կրակոցը։

Մինչ այժմ նման կասկածները մերժվում էին ապագա ֆյուրերի ալիբիի շնորհիվ. պաշտոնական վարկածով՝ Գելիի մահվան օրը նա Նյուրնբերգում էր։

Սակայն գերմանացի պատմաբան Հարալդ Զանդները պնդում է, թե հայտնաբերել է ապացույցների «ջախջախիչ զանգված», որը վկայում է, որ Հիտլերը իրականում կարող էր գտնվել դեպքի վայրում։

Պաշտոնական վարկածով՝ Գելիի մարմինը սեպտեմբերի 19-ին՝ շաբաթ օրը, գտել է ծառան՝ նրա ննջասենյակի հատակին՝ Հիտլերի մյունխենյան բնակարանում։

Հիտլերը քաղաքից հեռացել էր մեկ օր առաջ և մեկնել Նյուրնբերգ, ուստի թվում էր, թե նա չէր կարող որևէ առնչություն ունենալ տեղի ունեցածի հետ։ Բացի դրանից, ոստիկանությունը դիահերձում չարեց։ Մահը ճանաչվեց ինքնասպանություն։

Սակայն Զանդները, հիմնվելով իր վերջին բացահայտումների վրա, վիճարկում է այս ժամանակագրությունը։

Նա պնդում է, թե հայտնաբերել է մահվան վկայականը, որից հետևում է, որ երիտասարդ կնոջ մարմինը հայտնաբերվել է 24 ժամ ավելի վաղ, քան մինչ այժմ համարվում էր։

«Քանի որ մարմինն այդ պահին արդեն, առանց որևէ կասկածի, բնակարանում էր, մահվան իրական ժամանակը պետք է զգալիորեն ավելի վաղ լիներ՝ կամ սեպտեմբերի 18-ի առաջին ժամերին, կամ նույնիսկ նախորդ գիշերը»,- The Telegraph-ին տված հարցազրույցում ասել է Զանդները։

Պատմաբանի ասելով՝ փաստաթղթում նշված ամսաթիվն ու ժամը «ամբողջովին հակասում են պաշտոնական վարկածին, որին 95 տարի հավատարիմ են մնացել բավարական դատական մարմինները և ՆՍԴԱՊ-ը՝ նացիստական կուսակցությունը»։

Զանդները նաև ենթադրել է, որ մյունխենյան ոստիկանությունը կարող էր դավադրության մեջ մտնել Հիտլերի հետ՝ թաքցնելով Գելիի մահվան իրական հանգամանքները և կոծկելով այս գործը։

Հիտլերի և նրա զարմուհու հարաբերությունների բնույթը դեռ նրանց կենդանության օրոք բազմաթիվ վեճերի առարկա էր։

Լավ հայտնի է, որ Գելին 17 տարեկանից ապրել է Հիտլերի հետ՝ նրա խիստ վերահսկողության ներքո։

Քանի որ Հիտլերը բարձրանում էր նացիստական կուսակցության կարիերայի սանդուղքով, նա ավելի ու ավելի սեփականատիրորեն էր վերաբերվում իր զարմուհուն՝ սահմանափակում էր նրա տեղաշարժի ազատությունը և արգելում նրան հարաբերություններ սկսել։

Մի անգամ, իմանալով, որ Գելին սիրավեպ է սկսել իր վարորդ Էմիլ Մորիսի հետ, Հիտլերը ստիպեց նրան անմիջապես դադարեցնել այդ հարաբերությունները, իսկ վարորդին ազատեց աշխատանքից։

Դրանից հետո Գելիին չէր թույլատրվում տնից դուրս գալ առանց հենց Հիտլերի կամ նրա մերձավորներից որևէ մեկի ուղեկցության։