նախընտրելի դարձնելԹուրքիայում քրդական հարցի կարգավորման շրջանակներում PKK-ի ցմահ դատապարտված առաջնորդ Աբդուլլահ Օջալանի նամակը Հյուսիսային իրաքի PKK-ի ճամբարների ղեկավարությանը հասցնելու համար Թուրքիայի խորհրդարանի քրդական «Խաղաղություն եւ ժողովրդավարություն» կուսակցության խմբակցության պատգամավորները ստիպված են եղել ռմբակոծության տակ հանդիպում իրականացնել։
Թուրքական Milliyet-ի փոխանցմամբ՝ 6 քուրդ պատգամավորներից բաղկացած պատվիրակությունն արդեն հասել էր Հյուսիսային Իրաքի Սուլեյմանիե քաղաք, երբ թուրքական օդուժն սկսել է վերջին շրջանի ամենաուժեղ ռմբակոծությունն իրականացնել Հյուսիսային Իրաքում գտնվող PKK-ի ճամբարների դեմ։
Այս իրավիճակից անակնկալի եկած PKK-ի առաջնորդները հրաժարվել են հանդիպել քուրդ պատգամավորների հետ, քանի որ Թուրքիան մի ոկղմից պնդում է քրդական հարցի կարգավորման մասին, մյուս կողմից բանակցությունների համար ուղարկված պատվիրակության հետեւից ռմբակոծում է իրենց։ Տեղի քրդական իշխանություններին հաջողվել է համոզել PKK-ի ղեկավար կազմին եւ քուրդ պատգամավորները խիստ անվտանգության միջոցառումների ներքո մեկնել են Քանդիլի շրջան։
Քուրդ պատգամավորները ռմբակոծվելու վտանգի տակ հանդիպում են անցակցրել PKK-ի առաջնորդներ Մուրադ Քարայըլանի, Սաբրի Օքի, Դուրան Քալքանի եւ այլոց հետ, որի ժամանակ քննարկել են PKK-ի առաջնորդ Աբդուլլահ Օջալանի նամակը՝ կապված զինադադարի, PKK-ի ուժերը հետ քաշելու եւ Թուրքիայից Իրաք տեղափոխվելու մասին։
Հյուսիսային Իրաքում գտնվող PKK-ի ղեկավարությունը Օջալանին փոխանցելու համար քուրդ պատգամավորներին է հանձնել պատասխան նամակ, որից հետո քուրդ պատգամավորները վերադարձել են Սուլեյմանիյե։
