Իշխանությունն այս ընտրություններում միայն մի բանում ճիշտ դուրս եկավ, այն, որ պայքարը երկրորդ տեղի համար է, իսկ երկրորդ տեղը զբաղեցրել է իշխանության թեկնածուն: Այս մասին այսօր՝ մարտի 4-ին, լրագրողների հետ հանդիպմանն ասաց «Ժառանգություն» կուսակցության անդամ Ստեփան Սաֆարյանը:

Նա նշեց, որ հետընտրական իրավիճակը եւ կոնֆլիկտը պայմանավորված է Հայաստանին պատիվ չբերող ընտրակեղծիքներով: Ստեփան Սաֆարյանի կարծիքով՝ հետընտրական շրջանը աննախադեպ է բոլոր առումներով՝ ի տարբերություն նախորդների, քանի որ այն դուրս է եկել մայրաքաղաքի տիրույթներից եւ բուռն ձեւով տարածվում է հանրապետության մարզերով:  Նրա խոսքով, ի տարբերություն  Լեւոն Տեր-Պետրոսյանի, Րաֆֆի Հովհաննիսյանը բաց է պահում հաղորդակցության կապուղիները քաղաքական դաշտի բոլոր խաղացողների հետ, ինչպես նաեւ շարժման հռետորաբանությունը պոզիտիվ է: «Րաֆֆի Հովհաննիսյանի կողմից գլխավորվող շարժումը կարեւոր դաս է քաղել նախորդներից, որն է՝ չանել այն, ինչը սխալ է արվել, եւ անել այն, ինչը չի արվել»,- ասաց նա:

Ստեփան Սաֆարյանի խոսքով՝ մինչ Սերժ Սարգսյանը շնորհավորական ուղերձներ է  ստանում, ՐաֆՖի Հովհաննիսյանը մարզերում ինաուգուրացիայի արարողություն է իրականացնում:

Ասուլիսի մյուս բանախոսը՝ ՀՀԿ-ական պատգամավոր Արտակ Դավթյանը, նշեց, որ  այն դրականը, որ մենք ունեցանք ընտրական պրոցեսներում, իր շարունակությունը կունենա նաեւ հետընտրական պրոցեսներում:  «Հետընտրական զարգացումներն իրենց տրամաբանությունն ունեն, ունեն իրենց առանձնահատկությունը եւ ի տարբերություն նախկինի՝ այս անգամ այցելությունները, հանրահավաքներն ընդգրկել են ամբողջ հանրապետության տարածքը, ակտիվ քննարկումներ են ընթանում քաղաքական դաշտի բոլոր կուսակցությունների, շարժումների հետ»,- ասաց նա:

Արտակ Դավթյանի կարծիքով՝   քայլերը, որոնք իրականացվում են, օրենքների, իրավունքի, Սահմանադրության դաշտում են, այս առումով եւս նոր խոսք է:

Լուսանկարը՝  Արսեն Սարգսյանի/NEWS.am