նախընտրելի դարձնելՀայ եւ լեհ ժողովուրդներին միավորում է նաեւ փոխադարձ համակրանքը: Այդ մասին ասել է Հայաստանի նախագահ Սերժ Սարգսյանը՝ իր պատվին Լեհաստանի նախագահ Բրոնիսլավ Կոմորովսկու անունից երեկ երեկոյան տրված պաշտոնական ընթրիքին:
Նախագահ Սերժ Սարգսյանն իր բաժակաճառում շնորհակալություն է հայտնել ջերմ հյուրընկալության համար, ապա անդրադարձել դարերի խորքից եկող հայ-լեհական բարեկամությանը, պատմական սերտ առնչությունների վրա կառուցված միջպետկան հարաբերություններին եւ Լեհաստանի հասարակական-քաղաքական կյանքում ակտիվ դերակատարում ունեցող լեհահայ համայնքին ու հայ-լեհական հարաբերությունների հեռանկարին:
«Մեծարգո՛ պարոն նախագահ, հարգարժա՛ն Առաջին տիկին,
Տիկնա՛յք եւ պարոնա՛յք,
Ուրախ եմ գտնվել Լեհաստանի բարեկամ հողում եւ խորապես զգացված եմ ձեր սրտաբաց հյուրընկալության համար: Շուրջ երկու տարի առաջ, պարոն Կոմորովսկի, Դուք էիք պաշտոնական այցով գտնվում Հայաստանում, ինչից ոչ միայն պահպանվել են ջերմ հիշողություններ, այլեւ արձանագրվել են շոշափելի հաջողություններ: Դրանք ամրագրվել են նաեւ Հայաստանի եւ Լեհաստանի բարձրաստիճան ղեկավարության, կառավարական եւ տարածքային մարմինների մշտական շփումների արդյունքում:
Սա իմ առաջին այցը չէ Լեհաստան եւ, լիահույս եմ, ոչ էլ վերջինը, բայց միշտ ինձ զգում եմ հարազատ երկրում: Եվ դա գալիս է ոչ միայն լեհերի հյուրընկալ բնավորությունից: Կարծում եմ, մեր ժողովուրդներին միավորում է նաեւ փոխադարձ համակրանքը: Մեզ միավորում են ժողովրդական խառնվածքի բազմաթիվ գծեր, ինչպիսիք են մարդամոտությունը, խարազանող ինքնաքննադատությունը, ձեռներեց ջիղը, այլ միջավայրերում հարմարվելու եւ լավագույն բարձունքների հասնելու ձգտումը:
Պատմական սերտ առնչությունների վրա կառուցված եւ այսօր արդեն 20-ամյա պատմություն ունեցող մեր միջպետական հարաբերությունները բնորոշվում են բարձր մակարդակով եւ բովանդակային խորություն ունեցող քաղաքական օրակարգով:
Վերջին շրջանում նշանակալիորեն ակտիվացել են բարձրաստիճան փոխայցելությունները` նախագահների, վարչապետների, արտաքին գործերի նախարարների, ինչպես նաեւ պետական այլ գերատեսչությունների ղեկավարների մակարդակով: Առկա է համագործակցություն շուրջ մեկ տասնյակ վարչատարածքային միավորների միջեւ:
Այդուհանդերձ, քաղաքական ակտիվ երկխոսության եւ բազմաոլորտ համագործակցության պայմաններում դեռեւս չօգտագործված մեծ ներուժ կա տնտեսական ոլորտում: Լիահույս եմ, որ առեւտրաշրջանառության ծավալի մեծացման եւ Հայաստանում լեհական տնտեսական ներկայության ընդլայնման ուղղությամբ մեր հետեւողական ջանքերը` Հայաստանում եւ Լեհաստանում պարբերաբար անցկացվող միջկառավարական հանձնաժողովի նիստերն ու գործարար համաժողովները, շատ շուտով տեսանելի արդյունքներ կտան։ Այստեղ՝ Վարշավայում, ինձ ուղեկցում են նաեւ հայաստանցի գործարարներ, որոնք ժամանել են մասնակցելու այս այցին զուգահեռ անցկացվող գործարար համաժողովին:
Մեծարգո՛ պարոն Նախագահ,
Հայաստանը՝ ի դեմս Լեհաստանի, միջազգային ասպարեզում ունի վստահելի գործընկեր, որը հանդիսանալով Եվրամիության Արեւելյան գործընկերության քաղաքականության նախաձեռնող երկիր` սրտացավորեն սատարում է մեր երկրի եվրամերձեցման ջանքերին:
Լավ հիշողություններ ունեմ Վարշավայի Արեւելյան գործընկերության գագաթնաժողովից, որին պատիվ ունեցա մասնակցել 2011թ. սեպտեմբերին: Այն կարեւոր հանգրվան հանդիսացավ Հայաստանի եվրոպական հանձնառությունների ամրապնդման համար:
Հարգարժա՛ն տիկնայք եւ պարոնայք,
Հայ եւ լեհ ժողովուրդների շուրջ հազարամյա պատմական ուղիները ամուր կամուրջ են դարձել մեր երկրների բարեկամական հարաբերությունների համար: Առավել քան գնահատելի է, որ այդ բարեկամությունը ծնունդ է առել մեր ազգին բաժին հասած դժվարին պահերին` լեհ ժողովրդի բարեսիրտ ու հյուրընկալ վերաբերմունքից:
Լեհաստանի եւ լեհ ժողովրդի վերաբերմունքը հայերի հանդեպ դրսեւորվեց նաեւ 2005թ. ձեր երկրի խորհրդարանի կողմից Հայոց ցեղասպանության ճանաչմամբ: Այն հաստատեց մարդկության դեմ նման ոճիրները դատապարտելու եւ կանխարգելելու լեհ հասարակության բարոյական մեծ գիտակցումը: Հայ ժողովուրդը եւ Հայաստանի իշխանությունները բարձր են գնահատում այդ քայլը:
Ինձ համար շատ հաճելի էր այսօր ներկա գտնվել Վարշավայում հայկական պուրակի անվանակոչման եւ խաչքարի տեղադրման արարողությանը: Մեծ ակնածանքով եմ սպասում Զամոսչ քաղաք իմ վաղվա այցելությանը, որը կրում է հայկական մշակույթի եւ ներկայության խորը հետքեր:
Այսօր լեհական հասարակության տարբեր շերտերում, ինչպես երկրի վարչա-քաղաքական, այնպես էլ մշակութային եւ գիտական շրջանակներում առկա են հայկական մասնիկներ: Բազմաթիվ են նաեւ հայտնի լեհ գործիչները, որոնք ունեն հայկական արմատներ` մեծանուն նկարիչներ եւ կոմպոզիտորներ, կինոռեժիսորներ եւ դերասաններ, լրագրողներ եւ նույնիսկ քաղաքական գործիչներ: Չեմ ցանկանում թվարկել` չնեղացնելու համար մյուսներին:
Ես հպարտ եմ, բոլոր այն հայերով, որոնք իրենց ստեղծագործ աշխատանքով մասնակցել եւ շարունակում են մասնակցություն բերել Ձեր երկրի բարգավաճմանը: Ես հպարտ եմ հայ-լեհական բարեկամությամբ եւ առավել քան վստահ եմ նրա փայլուն ապագայի մեջ»,-ասել է նախագահ Սերժ Սարգսյանը՝ առաջարկելով բաժակ բարձրացնել ի պատիվ նախագահ Բրոնիսլավ Կոմորովսկու եւ նրա տիկնոջ, ի նպաստ հայ-լեհական դարավոր բարեկամության:
