Հատուկ քննչական ծառայության վարույթ է ընդունվել քաղաքացի Արամ Եղիազարյանի կողմից ոստիկանության աշխատակցի նկատմամբ բռնություն գործադրելու հետ զուգորդված խուլիգանություն կատարելու դեպքի առթիվ ՀՀ ՔՕ 258-րդ հոդվածի 2-րդ մասով հարուցված քրեական գործը:

ՀՔԾ մամուլի ծառայությունից հայտնում են, որ նախաքննությամբ պարզվել է, որ Հրազդան քաղաքի բնակիչ Արամ Եղիազարյանը 2013թ. սեպտեմբերի 1-ին` ժամը 23:30-ի սահմաններում Ծաղկաձոր քաղաքի «Նացիոնալ» սրճարանի մուտքի մոտ, վիճաբանության ժամանակ ծեծի է ենթարկել սրճարանի աշխատակից Վ. Դ.-ին` նրան պատճառելով մարմնական վնասվածքներ: Նույն օրը` դրանից մեկ-երկու ժամ անց` Ա. Ե.-ն իր անձնական օգտագործման ավտոմեքենայով նույն սրճարանի հարակից փողոցով անցնելու ժամանակ նկատելով, որ այդտեղ հավաքված անձանցից մեկն իրեն ձեռքով կանգնելու ազդանշան է տալիս` կանգնել է ու իջել ավտոմեքենայից:

Իջնելուց հետո Արամ Եղիազարյանին է մոտեցել ՀՀ ոստիկանության Կոտայքի մարզային վարչության աշխատակից Ս. Ս.-ն եւ սկսել է վիճաբանել նրա հետ` Վ. Դ.-ին ծեծի ենթարկելու հարցի առիթով:

Արամ Եղիազարյանը եւ Ս. Ս.-ն դիտավորությամբ հասարակական կարգը կոպիտ կերպով խախտելով, որն արտահայտվել է հասարակության նկատմամբ բացահայտ անհարգալից վերաբերմունքով` շուրջ 5-10 րոպե հայհոյանքներ են տվել, քաշքշել ու հարվածել միմյանց, որի ընթացքում Արամ Եղիազարյանն իր ավտոմեքենայում գտնվող դանակով դիտավորությամբ հարվածել է նաեւ իրենց մոտեցած Ս. Ս.-ի ազգականներին` Հրանտ եւ Վարդան Սեդոյաններին` նրանց պատճառելով մարմնական վնասվածքներ:

Արամ Եղիազարյանի նկատմամբ որպես խափանման միջոց է ընտրվել ստորագրություն` չհեռանալու մասին, եւ մեղադրանք առաջադրվել ՀՀ ՔՕ 117-րդ հոդվածով, 118-րդ հոդվածով եւ 258-րդ հոդվածի 2-րդ մասով: Նախաքննությունը շարունակվում է: