նախընտրելի դարձնել
Հայաստանի դատախազությունը պնդում է, որ դատախազության կադրային փոփոխությունները պայմանավորված չեն յուրայիններով կամ օտարներով:
Դատախազության մամուլի ծառայության տարածած հայտարարության մեջ ասվում է. «Կարեւորելով հանրության տեղեկացված լինելու իրավունքը, հանրության առջեւ սեփական գործողությունների հաշվետվողականությամբ հանդես գալու ժողովրդավարական սկզբունքի ապահովումը եւ նկատի ունենալով Հայաստանի Հանրապետության դատախազության համակարգում տեղի ունեցող կադրային փոփոխությունների նկատմամբ հասարակական հետաքրքրությունը, միաժամանակ, տարատեսակ մեկնաբանություններն ու երբեմն նաեւ շահարկումները` հայտնում ենք հետեւյալը.
Ողջունելի է, որ գերատեսչական ներքին փոփոխությունները արժանանում են զանգվածային լրատվամիջոցների եւ հասարակության լայն զանգվածների ուշադրությանը: Դատախազության նկատմամբ դրսեւորած նման ուշադրությունը հույս ունենք, որ պայմանավորված է հանցավորության դեմ պայքարում, օրինականության ապահովման, քաղաքացիների շահերի ու իրավունքների պաշտպանության գործում հասարակական գիտակցության մեջ դատախազության դերի առանձնահատուկ կարեւորության ընկալումով:
Մամուլում հրապարակված մեկնաբանությունների, ինչպես նաեւ անհարկի շահարկումների, թե դատախազությունում «կադրային ջարդ է», եւ այլն, որ իբրեւ թե կադրային փոփոխություններն ընդհանուր առմամբ պայմանավորված են անձնական մոտիվներով, անհիմն են, քանի որ.
ՀՀ գլխավոր դատախազ Գ.Կոստանյանն Ազգային Ժողովում, պատգամավորների հետ հանդիպումների, եւ ՀՀ գլխավոր դատախազությունում, առաջին իսկ խորհրդակցության ժամանակ հայտարարեց, որ ինքը չի առաջնորդվելու յուրայիններով կամ օտարներ սկզբունքով. բոլորն իր համար յուրային են: Միաժամանակ, պարոն Գ.Կոստանյանը, համակարգի աշխատակիցներին առաջադրեց նոր պայմաններ, նոր մոտեցումներ` պահանջով, որ առաջադրված պայմանները կատարվեն, լինեն շիտակ, ունենան մասնագիտական բարձր պատրաստվածություն, եւ ցանկացած մարդ, ով ազնիվ ու աշխատասեր է, միշտ առանց որեւէ խոչընդոտի կշարունակի իր պաշտոնավարումը, իսկ այդ սկզբունքներին չհամապատասխանող մարդը կզրկվի իր պաշտոնից:
Ցանկանում ենք հատուկ շեշտել, որ մինչ այս, ՀՀ դատախազության համակարգում կատարված փոփոխությունները որեւէ կապ չունեն ՀՀ գլխավոր դատախազի առաջադրած պայմանների կատարման հետ: Պարոն Գ.Կոստանյանը դեռեւս դատախազության որեւէ պաշտոնյայի չի ազատել իր զբաղեցրած պաշտոնից:
Բոլոր պաշտոնաթող աշխատակիցներն ազատվել են` իրենց անձնական դիմումների համաձայն: Նրանցից շատերը, զանգվածային լրատվամիջոցներին տված հարցազրույցներում, հստակ ներկայացրել են աշխատանքից ազատվելու պատճառները, այն է՝ երկարամյա կենսաթոշակի անցնելու, հանգստի գնալու, առողջական վիճակի կամ այլ աշխատանքով զբաղվելու ցանկությամբ:
Կասկածի տակ առնել դատախազական աշխատանքի երկարամյա վաստակ ու պետական բազում պարգեւներ ստացած մարդկանց հայտարարությունները, կարծում ենք` կոռեկտ չէ:
Կադրային փոփոխություններում անձնական դրդապատճառների բացակայության մասին է խոսում նաեւ այն հանգամանքը, որ գլխավոր դատախազ Գ.Կոստանյանի կողմից այսօր ղեկավար պաշտոններում նշանակվող դատախազները եւս նույն համակարգի երկարամյա աշխատողներ են: Հրապարակային արձագանքները նոր նշանակված դատախազների պրոֆեսիոնալ եւ մարդկային հատկանիշների վերաբերյալ, որը միմիայն դրական է, ուղղակի վկայությունն է, որ ինքնանպատակ կամ այլ սուբյեկտիվ պատճառներով փոփոխություններ դատախազության համակարգում չեն կատարվում:
Այսուհետ, երբ որեւէ դատախազ, ով աշխատանքից կազատվի ոչ թե սեփական դիմումի համաձայն, այլ ՀՀ գլխավոր դատախազին առընթեր էթիկայի հանձնաժողովի եզրակացության հիման վրա՝ ՀՀ գլխավոր դատախազի հրամանով, կամ կենթարկվի այլ կարգապահական տույժի, հանրությունը պատշաճ կիրազեկվի` հեռացման պատճառների եւ ստացած կարգապահական տույժերի մասին»:
