Սահմանների պահպանության սուրբ գործը միասին ի կատար ենք ածելու: Այս մասին, Տավուշի մարզ կատարած իր աշխատանքային այցի ժամանակ, սահմանամերձ Ոսկեպար գյուղում նշել է Հայաստանի վարչապետ Տիգրան Սարգսյանը:

Կառավարության մամուլի ծառայությունից հայտնում են, որ վարչապետը մասնակցել է Հայաստանի սոցիալական ներդրումների հիմնադրամի աջակցությամբ կառուցված համայնքի երկհարկանի կենտրոնի բացմանը:

Դիմելով համայնքի բնակիչներին Տիգրան Սարգսյանը նշել է. «Դուք ապրում եք այնպիսի մի տարածքում, որտեղ առկա է ամենօրյա վտանգ եւ մեր բանակի հետ միասին առաջին ճակատում եք: Դուք պետք է վստահ լինեք, որ ձեր բոլոր հարցերը գտնվում են մեր ուշադրության կենտրոնում, որ մեր սահմանների պահպանության սուրբ գործը միասին ի կատար ենք ածելու եւ թշնամին միշտ ստանալու է այնպիսի հակահարված, որ չհամարձակվի խանգարել ձեր անդորրը: Ցանկանում եմ ձեզ, որ լինեք ամուր եւ մենք ձեզ հետ միասին ի վիճակի ենք լինելու լուծել մեր ժողովրդին հուզող բոլոր հարցերը: Դուք հերոսներ եք»:

Այնուհետեւ վարչապետը շրջել է համայնքի կենտրոնով եւ ծանոթացել ստեղծված պայմաններին:

Կենտրոնն ունի ակումբային սենյակներ եւ դահլիճ: Մեկ տարի տեւած շինաշխատանքների ընթացքում շենքում ստեղծվել են անհրաժեշտ բոլոր ենթակառուցվածքները: Իրականացվել են ջրամատակարարման, կոյուղու, էլեկտրամատակարարման ու գազամատակարարման ներքին եւ արտաքին համակարգերի, կեղտաջրերի կուտակման հորի եւ ջեռուցման համակարգի կառուցման աշխատանքներ: Շենքն ապահովված է ջեռուցման համակարգով:

Ծրագրով բարեկարգվել եւ ասֆալտապատվել է նաեւ համայնքային կենտրոնի տարածքը: Կենտրոնի կառուցման համար ներդրվել է ավելի քան 67 մլն դրամ, որից  3,2 մլն-ը` «Դետրոյթի հայ կանանց  ակումբ»-ի կողմից:

Կենտրոնին հատկացվել են 716 հազար դրամի արժողության գրասեղաններ, գրապահարաններ, աթոռներ:

Ոսկեպարի համայնքային նախկին կենտրոնի վթարային կառույցն ապամոնտաժվել է:

Նշենք, որ դեռեւս 1998 թվականին ՀՍՆՀ-1 ծրագրով Ոսկեպար գյուղում իրականացվել են խմելու ջրագծի, ջրամբարի կառուցման աշխատանքներ, որի արժեքը կազմել է 97 մլն դոլար:

Իջեւանում վարչապետը ծաղիկներ է դրել Զոհված ազատամարտիկների հուշակոթողին` հարգանքի տուրք մատուցելով նրանց վառ հիշատակին:

Այնուհետեւ գործադիրի ղեկավարը Իջեւանում ծանոթացել է վերականգնված քանդակներին:

Նշենք, որ Փոքր եւ միջին ձեռնարկատիրության զարգացման ազգային կենտրոնի (ՓՄՁ ԶԱԿ) Տեղական տնտեսական զարգացման ծրագրի շրջանակներում զբոսաշրջության զարգացման նպատակով վերականգնվել են Իջեւանում կայացած  սիմպոզիումների ժամանակ ստեղծված քանդակները: ՓՄՁ ԶԱԿ-ի կողմից ընդհանուր առմամբ Իջեւանում վերականգնվել եւ լուսավորվել են շուրջ 40 քանդակներ, որոնք  տեղադրվել են քաղաքի կենտրոնական փողոցներում:

Տիգրան Սարգսյանը ծանոթացել է նաեւ Իջեւանի հրապարակի տաղավարներում ներկայացված  Տավուշի մարզում ՓՄՁ ԶԱԿ-ի օժանդակությամբ իրենց գործունեությունը սկսած ձեռնարկությունների արտադրանքներին, որոնք ունեն արտահանման մեծ ներուժ: