նախընտրելի դարձնելՀայաստանի Ազգային անվտանգության խորհրդի քարտուղար Արթուր Բաղդասարյանն ապրիլի 23-ին ընդունել է ԵԱՀԿ խորհրդարանական վեհաժողովում Իտալիայի պատվիրակության ղեկավար, խորհրդարանի անդամ Ռիկարդո Միգլիորիին:
Ազգային անվտանգության խորհրդի քարտուղարի մամուլի գրասենյակից NEWS.am-ին հայտնում են, թե Ռիկարդո Միգլիորին տեղեկացրել է, թե պատրաստվում է ապրիլի 24-ին այցելել Ծիծեռնակաբերդի հուշահամալիր` հարգելու Հայոց ցեղասպանության զոհերի հիշատակը: Արթուր Բաղդասարյանը շնորհակալություն է հայտնել Ռիկարդո Միգլիորիին 1915 թվականին Թուրքիայում ցեղասպանության ենթարկված մեկուկես միլիոն հայերի հիշատակը հարգելու համար` նշելով, որ միջազգային հանրության կողմից Հայոց ցեղասպանությունը դատապարտելը կկանխի աշխարհում նոր ցեղասպանությունների իրականացումը:
Հյուրի խնդրանքով Արթուր Բաղդասարյանը ներկայացրել է Հայաստանի դիրքորոշումը հայ-թուրքական հարաբերությունների վերջին զարգացումների հետ կապված, ինչպես նաեւ` ԼՂ հիմնախնդրի կարգավորման վերաբերյալ: Երկուստեք կարեւորվել է կովկասյան տարածաշրջանում խաղաղության ու կայունության հաստատումն ու պահպանումը:
