Լիբանանի Հանրապետություն կատարած պաշտոնական այցի շրջանակներում ՀՀ պաշտպանության նախարար Սեյրան Օհանյանն ապրիլի 14-ին հանդիպումներ է ունեցել Լիբանանի վարչապետ Թամամ Սալամի, փոխվարչապետ, ազգային պաշտպանության նախարար Սամիր Մոքբելի եւ զինված ուժերի հրամանատար, գեներալ Ժան Քահվաժիի հետ:

Հանդիպումների ընթացքում քննարկվել են պաշտպանության ոլորտում հայ-լիբանանյան համագործակցության զարգացման հեռանկարներին եւ տարածաշրջանային զարգացումներին վերաբերող հարցեր:

Կողմերը կարեւորել են երկու երկրների զինված ուժերի միջեւ համագործակցության զարգացումը երկկողմ հետաքրքրություն ներկայացնող ոլորտներում, այս տարվա մարտին ստորագրված երկկողմ համագործակցության ծրագրի ամբողջական իրականացումը, ինչպես նաեւ բարձր մակարդակի փոխայցելությունների կազմակերպումը: Այս համատեքստում ՀՀ պաշտպանության նախարարը Լիբանանի իր գործընկերոջը հրավիրել է պաշտոնական այցով այցելել ՀՀ:

 Նույն օրը ՀՀ պաշտպանության նախարարին ընդունել է Մեծի Տանն Կիլիկիո Ն.Ս.Օ.Տ.Տ. Արամ Ա Կաթողիկոսը:

ՀՀ պաշտպանության նախարարն այցելել է նաեւ սփյուռքում գործող հայ հայտնի կրթօջախներից մեկը` Բեյրութի Հայկազյան համալսարան եւ հանդիպում ունեցել հայ ուսանողների հետ:

ՀՀ դեսպանությունում կազմակերպվել է նաեւ ՀՀ պաշտպանության նախարարի հանդիպումը լիբանանահայ համայնքի ազգային կառույցների ղեկավարների հետ: