Որեւէ մեկին ճնշելու, ահաբեկելու խնդիր չունենք. Հունան Պողոսյան

Սահմանադրական փոփոխությունների հանրաքվեին նախապատրաստվելու ու անցկացնելու նպատակով ոստիկանությունում ստեղծվել է օպերատիվ շտաբ: Ընդդիմադիր ճակատը մտահոգություն ունի, որ այս շտաբը սահմանադրական փոփոխությունների դեմ պայքարը ճնշելու նպատակով է: Այս մտահոգությունը պայմանավորված է նաեւ այն հանգամանքով, որ շտաբի կազմում ընդգրկված է աղմկահարույց պատմությունների հերոս, փոխոստիկանապետ Լեւոն Երանոսյանը: Թե շտաբը  «Ոչ»-ի ճակատի նկատմամբ ինչ գործառույթներ է ստանձնել, NEWS.am-ի հետ զրույցում մանրամասնել է ոստիկանապետի առաջին տեղակալ, օպերատիվ շտաբի ղեկավար Հունան Պողոսյանը:

Պարոն Պողոսյան, ի՞նչ գործառույթներ ունի ոստիկանությունում հանրաքվեից առաջ ձեւավորված օպերատիվ շտաբը: Սահմանադրական փոփոխությունների դեմ պայքարող ճակատում անհանգստություն կա, որ այն ստեղծվել է նրանց վախեցնելու, պայքարը ճնշելու նպատակով:

Բոլոր ընտրությունների ժամանակ` սկսած Տեղական ինքնակառավարման մարմիններից մինչեւ համապետական ընտրություններ, ոստիկանությունը օրենքով սահմանված հստակ գործառույթներ ունի: Թվարկեմ կարեւորները: Ընտրացուցակների ճշգրտումը, հրապարակումը, ընտրատեղամասերում ու հարակից տարածքներում հասարակական կարգի պահպանություն, ընտրական հանձնաժողովների, վստահված անձանց, դիտորդների, ընտրողների անվտանգության ապահովում, քարոզչական շրջանում հանրահավաքների, երթերի, անվտանգության ապահովում եւ այլն: Միակ գերատեսչությունն ենք, որ մեր բոլոր ստորաբաժանումները,  ծառայությունները այս ծավալով մասնակցում են ընտրական գործընթացին: Ստեղծված օպերատիվ շտաբը համակարգելու է այս աշխատանքները: 90-ական թվականներից սկսած` բոլոր ընտրությունների ժամանակ կազմավորվել  ու գործել են այսպիսի շտաբներ:

Ինչ վերաբերում է  Ձեր կողմից նշված ընդդիմադիրներին վախեցնելու, ճնշելու չակերտավոր մտահոգությունները, դրանք ուղղակի հերթական անգամ արհեստական  լարվածություն ստեղծելու փորձեր են:

Ընդդիմադիրների հավաքների, երթերի  նկատմամբ վերահսկողության գործառույթ ունի՞  շտաբը:

Բացարձակ, որեւէ մեկի նկատմամբ` լինի դիմադիր, թե ընդդիմադիր, վերահսկողություն չենք իրականացնում: Ես նշեցի` երբ բոլորը սկսեն քարոզարշավը, մեր գերխնդիրն է, ով ուզում է անցկացնի՝ «Այո»-ի,  «Ոչ»-ի, կամ չեզոք  կողմ, իրականացնենք հասարակական կարգի պահպանություն:

Շտաբի վերաբերյալ մտահոգությունները  պայմանավորված են նաեւ ներքին զորքերի հրամանատար Լեւոն Երանոսյանի գործոնով, ով ընդգրկված է շտաբի կազմում: Իսկ նա հայտնի է ընդդիմադիրներին ճնշելու աղմկահարույց դեպքերից: Ինչո՞ւ է ընդգրկվել Երանոսյանը, ով ցույցերի ժամանակ գործել է օրենքը շրջանցելով:

Այս հարցերին բազմիցս անդրադարձել ենք։ Թե ոստիկանության պետը, թե ես, թե լրատվական վարչության պետը, բայց մեկ անգամ եւս նշեմ, որ բոլոր ստորաբաժանումների եւ ծառայությունների պատասխանատուները` այդ թվում ոստիկանապետի տեղակալները, ընդգրկված են օպերատիվ շտաբում,  նաեւ` պարոն Երանոսյանը` որպես ոստիկանապետի տեղակալ ու ոստիկանության ներքին զորքերի հրամանատար: Կարծում եմ` այսքանով ամեն ինչ ասված է: Իսկ այն, որ պարոն  Երանոսյանը  հայտնի է աղմկահարույց դեպքից, պարզապես նախկին դեպքի շահարկումներն են, որոնք շարունակ կրկնելով` ուզում են թյուրիմացության մեջ գցել հանրությանը: Մեկ դեպք է եղել, որի շուրջ կատարվել է ծառայողական քննություն:  Աննախադեպ բան է եղել`  ոստիկանության պետի հրամանով պարոն Երանոսյանը կարգապահական տույժի է ենթարկվել: Բոլոր փաստերով ծառայողական քննություններ  են իրականացվել:

Այդ տույժը բավարար հիմք չէ՞ր, որ նա չընդգրվեր շտաբի կազմում:

Ծառայողական գործունեության ընթացքում բոլոր պաշտոնյաները կարող են ե՛ւ խրախուսվել, ե՛ւ տույժեր ստանալ: ինչ-որ մեկ տույժը հիմնավոր պատճառ չէ մարդուն չընդգրկելու համար, այն էլ` նրա նման բազմափորձ մարդու` որպես ոստիկանության ներքին զորքերի ստորաբաժանման ղեկավար: Նա նշանակվել է շտաբում  նույն տրամաբանության շրջանակում, ինչպես բոլորը:

Իսկ երաշխիքներ կա՞ն, որ այս անգամ Երանոսյանը չի կրկնի նույնը, հետեւություն արե՞լ է տույժից:

Բոլորն էլ հետեւություն արել են…

Շտաբը որեւէ գործառույթ ստանձնե՞լ է ընդդիմադիրներին ահաբեկելու, վախեցնելու, շարժումը  ճնշելու հետ կապված, ինչի վերաբերյալ ՀԿ-ների, ընդդիմադիր ճակատի ներկայացուցիչները  մտահոգություն ունեն:

Կներեք, կարծում եմ`  հարցը կոռեկտ չէ: Այդ չակերտավոր մտահոգություններից տեղյակ եմ եւ, անկեղծ ասած,  չեմ դադարում իրենց վրա զարմանալ: Անձինք կան, որ  մնացել են 90-ականների մեջ, նրանց թվում է` մենք  էլ ենք 90-ականների մեջ, փչացած ձայնապնակի  նման շարունակ նույն երգն են կրկնում, անհեթեթ մտքեր հայտնում` մոռանալով, որ այն հասարակությունը, որի անունից հանդես են գալիս, փոխվել է, ոստիկանությունն է փոխվել… Բազմիցս ասել ու կրկնում եմ` ոստիկանությունը ապաքաղաքական ու վերկուսակցական կառույց է: Մենք գործում ենք բացառապես օրենքի շրջանակում եւ հանուն օրենքի, որեւէ մեկին  ահաբեկելու ու ճնշելու խնդիր ու ցանկություն չունենք:  Մեր առջեւ հասարակական կարգի եւ քաղաքացիների անվտանգության ապահովության խնդիրն է դրված, որն իրականացրել ու իրականացնելու ենք: Կա հստակ խնդիր` կատարել օրենքի պահանջը, ի դեպ,  նաեւ այդ պահանջը հանրության կողմից կատարելու խնդիր:

Դուք շեշտում եք օրենքը կատարելու պահանջը, սակայն ընդդիմադիր ճակատը բարձրաձայնում է մտավախությունների մասին` հիմնվելով վերջին` Բաղրամյան պողոտայում հունիսի 23-ին դեպքի վրա, երբ բռնի ուժով ոստիկանությունը ցրեց խաղաղ հանրահավաքը: Սա՞ էլ էր օրենքի շրջանակում:

Ինչ բռնության մասին է խոսքը: Ոստիկանությունը գործել է օրենքի շրջանակներում: Իսկ եթե եղել են իրենց լիազորությունները սահմանազանցած ծառայողներ, ապա քննություն սկսվեց, որը մի մասի վերաբերյալ շարունակվում է մինչեւ հիմա, մյուսները ենթարկվել են կարգապահական պատասխանատվության:

Սահմանադրական փոփոխությունների դեմ հանրահավաքները մեկնարկում են հոկտեմբերի 30-ից, թերեւս կլինեն նաեւ բողոքը հայտնելու շուրջօրյա ցույցեր, երթեր, ոստիկանությունը ինչպե՞ս է տրամադված: Ի՞նչ է սպասվում ցուցարարներին այդ կարեւոր ընտրության դեմ պայքարի գործում, հնարավո՞ր է կրկնվի հունիսյան ձեռագիրը:

Բազմիցս ասել ենք, որ ոստիկանությունը այն գերատեսչությունն է, որին օրենքով սահմանված կարգով ուժ գործադրելու լիազորություն է վերապահված: Բռնությունը ուժի գործադրման հետ խառնողները, շատ լավ էլ հասկանում են` ինչի մասին են խոսում: Այս պահին ի պաշտոնե հայտարարում  եմ` ոստիկանությունը կոչված է իր լիազորությունների սահմանում ապահովել ցանկացած հանրահավաքի, նստացույցի, երթի անցկացումը եւ նաեւ մասնակիցների անվտանգությունը, եթե այդ միջոցառումները օրինական են: Նույն խստությամբ, նույն պատրստակամությամբ ոստիկանությունը կոչված է բացահայտելու ու կանխարգելելու օրինականության ցանկացած խախտում` դարձյալ կիրառելով մեր ողջ ուժերն ու հնարավորությունները: Օպերատիվ շտաբը ոչ մեկի դեմ պայքարելու ֆունկցիա չունի, ընդամենը մի գերխնդիր ունի` համապետական միջոցառումները անցկացնել օրենքի շրջանակներում: Այդ ընթացքում` որպես համակարգող շտաբ, համագործակցել բոլոր շահագրիգիռ գերատեսչությունների ու հասարակական կազմակերպություների հետ: Այդպես եղել է նաեւ նախորդ ընտրությունների ժամանակ:

Զրուցեց Գայանե Սարիբեկյանը