Ուկրաինայի Ռադայի պատգամավոր, «ՈՒԿՐՈՊ» կուսակցությունից ուկրաինական Դնեպրոպետրովսկի քաղաքապետի թեկնածու Բորիս Ֆիլատովը տեղեկացրել է, որ ձերբակալվել է Կիեւի քաղաքապետի նախկին թեկնածու, ուկրաինացի օլիգարխ Իգոր Կոլոմոյսկու զինակից Գենադի Կորբանը:

«Կուսակցության անդամների տներում զանգվածային խուզարկություններ են անցկացվում: Նրանց գրասենյակներում, գործընկերների մոտ:  ՈՒԱԾ-ն ձերբակալել է Կորբանին եւ տարել անհայտ ուղղությամբ», - տեղեկացրել է Ֆիլատովը:

Ուկրաինայի Անվտանգության ծառայության (ՈՒԱԾ) պաշտոնական ներկայացուցիչ Ելենա Գիտլյանսկայան հաստատել է այդ տեղեկությունը:   Գիտլյանսկայայի խոսքով, Կորբանին  կասկածում են հանցավոր խմբավորման գործունեությունը կազմակերպելու մեջ: 

Դնեպրոպետրովսկում  հանցավոր խմբավորումը  Հակաահաբեկչական ծառայության մարտիկների բարեգործական հիմնադրամից 40 մլն գրիվեն է յուրացրել, ասել է Ելենա Գիտլյանսկայան, տեղեկացնոմ է «Ուկրաինա 112» հեռուստաալիքը:

Գլխավոր դատախազության դատախազ Վլադիսլավ Կուցենկոն տեղեկացրել է, որ իրավապահներն ուսումնասիրում են  «այդ հանցավոր կազմակերպության» ղեկավարության հարցը: Նա տեղեկացրել է, որ հանցավոր խմբավորման վերացման նպատակով հատուկ ծառայության շրջանակում իրականացված խուզարկություններն անցկացվում են նաեւ օրինապահ ուժերի առանձին ներկայացուցիչների տներում:

Դնեպրոպետրովսկցի  օլիգարխ Իգոր Կոլոմոյսկու զինակից 45-ամյա Գենադի Կորբանը առաջադրվել էր  Կոլոմոյսկու նոր քաղաքական նախագծի`  «Ուկրաինացի հայրենասերների միավորում` ՈՒԿՐՈՊ»-ի կողմից: