նախընտրելի դարձնել
«Սասնա ծռերի» 2 անդամների՝ Վարդան Գերավետյանի եւ Թորոս Թորոսյանի խափանման միջոցը փոխելու միջնորդություն ներկայացվեց դատարանում: Երեւանի ընդհանուր իրավասության դատարանի Շենգավիթի նստավայրում այսօր՝ հուլիսի 13-ին, պաշտպաններն իրենց միջնորդեցին ամբաստանյալներին ազատ արձակել՝ կիրառելով այլընտրաքային խափանման միջոց կամ գրավ:
Մեղադրող կողմը չառարկեց ներկայացված միջնորդության դեմ։ Միջնորդություն ներկայացվեց նաեւ դատաբժշկական փորձաքննություն նշանակել ամբաստանյալ Մարտիրոս Հակոբյանի վերաբերյալ։
Այս միջնորդությանը նույնպես մեղադրող կողմը չառարկեց:
Ամբաստանյալ Թաթուլ Թամրազյանն էլ հայտարարեց, որ հրաժարվում է իր պաշտպաններից եւ ցանկանում է, որ իր շահերի պաշտպանությամբ զբաղվի փաստաբան Մոնիկա Նազարյանը։
Նախագահող դատավոր Արշակ Վարդանյանը հեռացավ խորհրդակցական սենյակ՝ որոշում կայացնելու:
Հիշեցնենք նաև, որ դատավոր Արշակ Վարդանյանի վարույթում է գտնվում Արամ Մանուկյանի, Հովհաննես Հարությունյանի, Թաթուլ Թամրազյանի, Արամ Հակոբյանի, Տիգրան Մանուկյանի, Արայիկ Հակոբյանի, Վարդան Գերավետյանի, Մարտիրոս Հակոբյանի, Սերգեյ Կյուրեղյանի, Գևորգ Իրիցյանի, Թորոս Թորոսյանի առանձնացված մասով գործը:
