Լիբիացի ապստամբները պնդում են, որ Բրեգա քաղաքում ընկել են ՆԱՏՕ-ի կոալիցիոն ուժերի ավիացիայի հարվածի տակ։

Ինչպես հայտնում է ВВС-ն, ավիահարձակման արդյունքում զոհվել է մի քանի մարդ։

Դատելով ականատեսների հաղորդագրություններից՝ կոալիցիայի հարվածի տակ է ընկել նաեւ Լիբիայի մայրաքաղաքը՝ Տրիպոլին։ Ավելի վաղ քաղաքում երկու հզոր պայթյուն էր որոտացել։

Վկաները հայտնել են, որ ռմբահարությունից առաջ երկնքում կոալիցիոն ուժերի օդանավեր են նկատել։

Այսօր վաղ առավոտյան ՄԱԿ-ի գլխավոր քարտուղար Բան Կի Մունը պահանջել էր Լիբիայում «անհապաղ դադարեցնել խաղաղ բնակչության դեմ ռազմական ուժի կիրառումը», հայտնում է «Ռոսբալտը»։

Լիբիայում զինվորական գործողություններ ներկայումս իրականացնում են ՆԱՏՕ-ի ուժերը։

Ապրիլի 6-ին Լիբիայի ապստամբների հրամանատար Աբդուլ Ֆաթահ Յունիսը ՆԱՏՕ-ին մեղադրել էր անգործության եւ բնակչությանը Քադաֆիի ուժերից պաշտպանել չկարողանալու մեջ։