նախընտրելի դարձնել
Խայտառակ տգեղ իրավիճակի ես հանդիպեցի: Այս մասին այսօր՝ հուլիսի 21-ին, ասաց «Մխիթար Սեբաստացի» կրթահամալիրի ուսուցիչներից Վիգեն Ավետիսը՝ անդրադառնալով կրթահամալիրի տնօրենի և ևս 2 այլ այլ ուսուցիչների բերման ենթարկելուն ոստիկանների կողմից:
«Այո, լուծվելու է այս խնդիրը, բայց լուծման այն ձևերը, որոնք կիրառվում են, անընդունելի են մեր հանրապետության համար»,- ասաց կրթահամալիրի ուսուցիչը:
Նա նշեց նաև, որ ոստիկանները կարող էին հանգիտ հրավիրել բաժին, բայց նրանք կանչեցին կարմիր բերետավորներին. «Ամենավերջին հանցագործների նման, կրթահամալիրի տնօրենին և ուսուցիչներից մի քանիսին բերման ենթարկեցին երեխաների ներկայությամբ: Բերման ենթարկելու տարբեր ձևեր կան, բայց պետք չէր վարվել, ինչպես տեռորիստների հետ: Մենք մշակույթ ենք ներկայացնում և հանկարծ հակամշակութային եղանակներ են գործադրում ոստիկանները իրենց արհամարական վերաբերմունքոով: Ոչ մի բան չի փոխվել այդ համակարգում, եթե այդ համակարգում բան չի փոխվել, նշանակում է հեղափոխություն չի եղել»,- ասաց կրթահամալիրի ուսուցիչը:
Նա նշեց նաև, որ հնարավոր է այդ ոստիկաններին ուղղորդել է մանկապարտեզի տնօրենը, քանի որ նա երրորդ անգամն է ոստիկաններ հրավիրում:
«Կարծես հատուկ խումբ ունի ոստիկանների, որ անընդհատ բերում է այստեղ՝ պաշտպանելու այդ մանկապարտեզը կրթահամալիրից, տպավորություն է, որ մեր դպրոցի աշակերտների և մանկապարտեզի երեխաների միջև սահման են գծում, ասես հայեր և Ադրբեջանցիներ լինեն»:
Կրթահամալիրի ուսուցիչը խնդրի լուծումը տեսնում է մանկապարտեզի տնօրենին աշխատանքից ազատելը, քանի որ, ըստ ուսուցչի՝ վերջինս թշնամանաք է սերմանում երեխաների և աշակերտների միջև: «Մեր պետության մեջ կատարվեց մի հանցագործություն և հանցագործներ պետք է պատժվեն, ոչ թե նրանց փոխարեն ուսուցիչները: Սա կրթահամալիր է, այստեղ ոստիկանների միջողով հարց չեն լուծում: Ոչ ոք չի կարող ինձ, Աշոտ Բլեյանին, կամ որևէ այլ արդար քաղաքացու պատժել»,- հավելեց Վիգեն Ավետիսը:
Հիշեցնենք, որ այսօր՝ հուլիսի 21-ին, ՀՀ Ոստիկանությունը «Մխիթար Սեբաստացի» կրթահամալիրի տնօրեն Աշոտ Բլեյանին և ևս երկու ուսուցչի բերման են ենթարկել կրթահամալիրի և հարակից տարածքից։ Ոստիկանների պարզաբանմամբ նրանք կարգ են խախտել, քանի որ կանգնած են եղել Հյուսիսային դպրոցի մասնաճյուղի և մանկապարտեզի տարածքում: Ոստիկաններն ասել են, որ իրենք ակցիա են իրականացնում, այդ իսկ պատճառով որոշել են բերման ենթարկել:
