նախընտրելի դարձնելԼոռու մարզի ընդհանուր իրավասության դատարանում (նստավայրը` Վանաձոր) այսօր` հուլիսի 6-ին տեղի ունեցավ մանկապղծության մեջ մեղադրվող Սերոբ Տեր-Պողոսյանի դատավարության առաջին նիստը: Դատարանի որոշմամբ` նիստն անցկացվել է փակ ռեժիմով, ինչը նախատեսված է «Քրեական դատավարության օրենսգրքի» 16-րդ հոդվածով` (Դռնփակ դատական քննություն անցկացվում է օրենքով նախատեսված դեպքերում՝ հանրության բարքերի, հասարակական կարգի, պետական անվտանգության, կողմերի անձնական կյանքի կամ արդարադատության շահերի պաշտպանության նկատառումներով):
Ինչպես NEWS.am-ի թղթակցի հետ զրույցում ասաց գործով Ս. Տեր-Պողոսյանի պաշտպան Գիվի Հովհաննիսյանը` դատաքննությունը հետաձգվել է մինչեւ հուլիսի 21-ը` ժամը 12-ը: «Ես եւ մյուս փաստաբանը նոր էինք ներգրավվել որպես պաշտպաններ եւ մեզ ժամանակ էր հարկավոր` քրեական գործի նյութերին ծանոթանալու համար»,-հայտնեց Հովհաննիսյանը:
Գործում ներգրավված մյուս պաշտպանը Տիգրան Սաֆարյանն է:
Նշենք, որ Սերոբ Տեր-Պողոսյանը Ախթալայի լեռնահարստացման Metal Prince կոմբինատի սեփականատերն է:
Սերոբ Տեր-Պողոսյանի անվան շուրջ սկանդալը հասունացավ այս տարվա սկզբին` Hetq.am կայքի հրապարակումից հետո: Մի շարք լրատվամիջոցների տվյալներով, մես տարվա ընթացքում Ալավերդի եւ Ախթալա քաղաքներում լուրեր էին շրջում, որ հայտնի բիզնեսմենի վերաբերյալ կոմպրոմատային տեսանյութ կա: Սակայն ոչ ոք չեր համարձակվում Ախթալայի լեռնահարստացման կոմբինատի սեփականատիրոջն ուղղակիորեն մեղադրել մանկապղծության մեջ: Առաջինն այդ քայլին գնաց 25-ամյա Վահրամ Փարսադանյանը:
Պարբերականի տվյալներով, հունվարի 22-ին ինչ-որ մի երիտասարդ, որը 30 հազար դոլարի պարտք ուներ, զանգահարել է Տեր-Պողոսյանին եւ սպառնացել, որ ոստիկանությանը կփոխանցի նրան մերկացնող տեսանյութը, եթե վերջինս ֆինանսապես չօգնի իրեն: Գործարարն, ի պատասխան, ինքն էր դիմել ոստիկանություն` խնդրելով լուծել իրեն սպառնացող երիտասարդի հարցը:
Հենց նույն օրը երիտասարդին ձերբակալել էին, սակայն վերջինս ոստիկաններին էր հանձնել խոստացված կոմպրոմատը: Սփյուռքահայ գործարարի զոհերի թվում են նաեւ իր կողմից հովանավորվող ֆուտբոլային թիմում խաղացող մի քանի տղաներ:
Մանկապղծության փաստի առթիվ հարուցվել է քրեական գործ: Տեր-Պողոսյանին մեղադրանք է առաջադրվել քրեական օրենսգրքի 140 եւ 139 հոդվածի հատկանիշներով: Դատախազությունը հաստատել է մեղադրանքը եւ այս քրեական գործն արդեն ուղարկվել է Լոռու մարզի ընդհանուր իրավասության դատարան` ըստ իրավասության քննելու համար:
