նախընտրելի դարձնելՎրաստանի հայաբնակ Սամցխե-Ջավախքի Ախալքալաքի շրջանում հուլիսի վերջին կմեկնարկի երկաթուղու կայարանի կառացումը: «Ախալքալաքի երկաթգծի կայարանի կառուցումը կմեկնարկի երեք շաբաթ անց: Կայարանը կկառուցվի գերմանացի հայտնի ճարտարապետ Յուրգեն Մայերի նախագծով»,-հայտնում է Վրաստանի տարածաշրջանային զարգացման եւ ենթակառուցվածքների նախարարության մամուլի ծառայությունը:
Այս տարվա մայիսին որոշում է կայացվել, որ երկաթգծի նոր`Բաքու-Թբիլիսի-Կարս ուղղության համար Վրաստանի կառավարությունը պետք է հատկացնի լրացուցիչ 575 միլիոն դոլար` երկարաժամկետ վարկի տեսքով:
Վրաստանն ու Ադրբեջանը հուլիսի 1-ին պայմանագիր են ստորագրել, համաձայն որի Վրաստանին վարկ է տրամադրվում: Փորձագետները կարծում են, որ փոխառումը դրական նշանակություն կունենա վրացական տնտեսության համար:
Հուլիսի սկզբին Ադրբեջանում տեղի է ունեցել երկկողմ համակարգող խորհրդի նիստը, որի ընթացքում հավանության է արժանացել 2011 թվականին իրականացվելիք շինարարական աշխատանքների 316 միլիոն դոլարը, հայտնում է «Նովոստի Գրուզիան»:
Բացի կայարանի կառուցումից, հատկացված գումարը կուղղորդվի նաեւ Տետրիցկարո-Ախալքալաք երկաթգծի տեղամասի կառուցմանն ու վերականգնմանը, ինչպես նաեւ մի շարք ենթակառուցվածքային օբյեկտների կառուցմանը:
