նախընտրելի դարձնելՀայաստանի կոմպոզիտորների միության նախագահ Ռոբերտ Ամիրխանյանը կգլխավորի Հայաստանի մշակույթի աջակցության հարցերով խորհուրդը: Այն գործում է որպես հասարակական կառույց եւ աջակցելու է տաղանդավոր ստեղծագործողներին` նրանց հեռանկարային նախագծերի վրա ուշադրություն հրավիրելու եւ ֆինանսավորում գտնելու նպատակով:
Խորհրդի կազմում ընդգրկվել են մշակույթի մի շարք գործիչներ` Գեղարվեստի ակադեմիայի ռեկտոր Արամ Իսաբեկյանը, Ազգային թատերական ստեղծագործական միավորման նախագահ Արա Խզմալյանը, հոգեւոր երաժշտության կենտրոնի տնօրեն Մհեր Նավոյանը եւ այլք: Խորհրդին ներկայացվող նախագծերի քննարկմանը կհրավիրվեն նաեւ փորձագետներ եւ արվեստի վարպետներ:
Խորհրդի գործունեությանն աջակցում է Գագիկ Ծառուկյանի բարեգործական հիմնադրամը, սակայն, ինչպես նշեց Ռ. Ամիրխանյանը, նախագիծը միայն կոնկրետ անձանց հովանավորչական աջակցության վրա չէ հիմնված: «Գրեթե բոլոր միջոցները կուղղվեն աշխատանքների կազմակերպմանը: Խորհրդի անդամներն աշխատելու են հասարակական հիմունքներով: Մենք պատրաստվում ենք կապեր հաստատել արտերկրի, հնարավոր է նաեւ` տեղական մշակութային հիմնադրամների եւ հովանավորչական կազմակերպությունների հետ, նրանց ներկայացնել տաղանդավոր, խոստումնալից ստեղծագործություններ: Դա նպաստելու է մեր կոմպոզիտորների, նկարիչների, գրողների ստեղծագործական վերելքին, այդ թվում` երիտասարդների: Սակայն ինչ որ մեկից կախվածություն մենք ամենաքիչն ենք ուզում: Շատ բանով դրանից է կախված` ինչպիսի ստեղծագործություններ կծնվեն մեզ մոտ»,-հայտարարեց Ամիրխանյանը:
