ՆԱՏՕ անդամների համատեղ կոմյունիկեի տեքստի նախագծում, Վաշինգտոնի գագաթաժողովի արդյունքների հիման վրա, Ուկրաինային դեպի դաշինքի անդամակցության տանող ճանապարհն անվանվել է «անշրջելի», տեղեկացրել է CNN-ը՝ հղում կատարելով իրազեկ աղբյուրներին։

Հարցն այն մասին, թե որքան ամուր երաշխիքներ պետք է տրամադրել Ուկրաինային ՆԱՏՕ-ին անդամակցության հարցում, քննարկումների կարեւոր թեմա է դարձել դաշինքի 32 անդամների միջեւ գագաթաժողովի նախօրեին, որը բացվելու է այսօր։

Փաստաթղթի նախագիծը դեռ կարող է փոխվել, բայց նման ձեւակերպման առկայությունը կդառնա կարեւոր ազդանշան Կիեւի եւ Մոսկվայի համար, գրել է CNN-ը։

Հեռուստաընկերության աղբյուրներից մեկը՝ մի ամերիկացի պաշտոնյա, ասել է, որ Սպիտակ տունը կաջակցի «անշրջելի» բառի օգտագործմանը կոմյունիկեում այն պայմանով, որ փաստաթղթում նաեւ հաստատվի, որ Կիեւի աշխատանքը դեմոկրատական բարեփոխումների ուղղությամբ կշարունակվի։