նախընտրելի դարձնել
Ֆինլանդիայի իշխանությունները ուկրաինական Naftogaz ընկերության խնդրանքով առգրավել են ռուսական պետական գույքի ավելի քան 40 օբյեկտ՝ ավելի քան 35 մլն եվրո արժողությամբ, հայտնում է Yle-ն՝ հղում անելով ֆիննական դատական կարգադրիչների ծառայությանը։
Դրանք ներառում են գիտության և մշակույթի ռուսական կենտրոնը Հելսինկիում, լողափը, որտեղ դիվանագետները կարող են հանգստանալ Պրիմորիեում, բնակարաններ Ֆինլանդիայի տարբեր քաղաքներում ռուսական հաստատությունների աշխատակիցների համար և այլ օբյեկտներ: Կալանքի որոշումը նշանակում է, որ գույքը չի կարելի վաճառել կամ փոխանցել:
Ֆինլանդիայում Ռուսաստանի դեսպանատանը «ՌԻԱ Նովոստիին» հայտնել են, որ Ֆինլանդիայի իշխանություններից պաշտոնական ծանուցումներ չեն ստացել գույքի առգրավման մասին։ Դիվանագիտական ներկայացուցչությունը տեղեկություն է խնդրել դատական կարգադրիչների ծառայությունից և արտաքին գործերի նախարարությունից։
ՌԴ նախագահի մամուլի քարտուղար Դմիտրի Պեսկովի խոսքով՝ Մոսկվան իր շահերը պաշտպանելու համար կօգտագործի իրավական բոլոր մեխանիզմները և դատարանում կվիճարկի Ֆինլանդիայի իշխանությունների այս որոշումը։
«Իհարկե, մենք դա կվիճարկենք դատարանում։ Ռուսաստանի Դաշնությունը կպաշտպանի իր շահերը, գույքային շահերը, ուստի մենք կօգտագործենք բոլոր իրավական մեխանիզմները մեր շահերը պաշտպանելու համար»,- ասել է Պեսկովը «Ինտերֆաքս»-ին։
Օգոստոսին Հելսինկիի դատարանը որոշել է կալանք դնել ռուսական օբյեկտների վրա՝ հիմնվելով Հաագայի արբիտրաժային դատարանի որոշման վրա՝ «Նավթոգազ»-ի հայցի հիմքով։ Այնուհետև դատարանը Ռուսաստանին պարտավորեցրել է 5 միլիարդ դոլար վճարել «Նավթոգազ»-ին բռնակցված Ղրիմում կորցրած գույքի համար։
Ռուսաստանը Ղրիմը միացրել է 2014 թվականին՝ խլելով թերակղզու ուկրաինական ընկերությունների և քաղաքացիների ունեցվածքը։ Դրանից հետո ուկրաինական իշխանությունները և առանձին «Նավթոգազ»-ը մի քանի հայցեր են ներկայացրել Ռուսաստանի դեմ միջազգային ատյաններում՝ գույքի կալանքի մեղադրանքով։
Դատարանի որոշումը կարող է հյարկադրաբար ի կատար ածվել, հայտնել են «Նավթոգազի»-ի մամուլի ծառայությունից։ Ընկերությունը նշել է, որ եթե Ռուսաստանը հրաժարվի կատարել դատարանի որոշումը, «Նավթոգազը» իրավունք ունի սկսել այլ երկրներում ռուսական գույքի հարկադիր բռնագրավման գործընթացը։
