նախընտրելի դարձնելԹուրքական բոյկոտի սպառնալիքները ֆրանսիական խոշոր ընկերություններին կարող է ոչ շահեկան իրադրության մեջ դնել, սակայն թուրքական ընկերությունների ղեկավարները եւս անհանգստացած են: Այս մասին տեղեկացնում է ֆրանսիական «Le Figaro»-ն:
Եթե ֆրանսիական խորհրդարանականները կողմ քվեարկեն ցեղասպանությունների այդ թվում` Հայոց ցեղասպանության ժխտումը քրեականացնող նախագծին, Թուրքիայի պատասխան քայլերը կարող են առնչվել նաեւ տնտեսական ոլորտին: Սպառողների ասոցիացիան կարող է բոյկոտել ֆրանսիական ապրանքները, իշխանություններն էլ կարող են ֆրանսիական խմբերին չընդգրկել պետական մրցույթներում:
Սակայն չի կարելի միանշանակ պնդել, որ ֆրանսիական ապրանքներ չգնելու կոչերն անպայման արդյունք կունենան:
«Renault»-ի ներկայացուցիչը նշել է, որ չի վախենում նման սպառնալիքներից, սակայն ուշադիր հետեւում է իրավիճակին: Թուրքիայի եւ Ֆրանսիայի նախկին հակասությունները ոչ մի կերպ առեւտրի վրա չեն անդրադարձել:
Եթե ֆրանսիական ընկերությունները բոյկոտից չեն վախենում, ապա կարող են անհարմար դրության մեջ հայտնվել պետական մրցույթների անցկացման ընթացքում:
Որքան էլ հակասական է, բոյկոտի հեռանկարներն անհանգստացնում են նաեւ թուրք գործատուներին. «Թուրքիայի տնտեսությունը արտահանման ուղղվածություն ունի եւ արտասահմանյան իր գործընկերների դիվերսիֆիկացիայի կարիքն է զգում` արտադրության եւ աշխատատեղերի պահպանման համար»,- նշել է Թուրք գործատուների ասոցիացիայի նախագահ Ումիթ Բոյները` Փարիզ կատարած այցի ընթացքում: Ֆրանսիան Թուրքիայի արտասահմանյան չորրորդ գործընկերն է: Թուրքիան 2010թ. 5,4 մլրդ եվրոյի արտադրանք է արտահանել Ֆրանսիա: Նա չի կարող իրեն թույլ տալ զրկվել նման սպառողից, այն դեպքում, երբ տնտեսագետները 2012թ. տնտեսական ակտիվության նվազում են կանխատեսում:
