նախընտրելի դարձնել
Եգիպտացի պաշտոնյաները Իսրայելին մեղադրել են լարվածություն բորբոքելու մեջ՝ պնդելով, որ զորքերի տեղաշարժերը Սինայի հյուսիսում երկրների միջև կնքված խաղաղության պայմանագրի խախտում են, գրում է Middle East Eye-ը։
Կահիրեում դիվանագիտական բարձրաստիճան աղբյուրը հայտնել է, որ Եգիպտոսի և Իսրայելի միջև հարաբերությունները գտնվում են ամենացածր մակարդակի վրա Գազայի պատերազմի սկզբից ի վեր, քանի որ մեծանում է այն մտավախությունը, որ Իսրայելի հարձակման վերսկսումը անկլավից պաղեստինցիների բռնի տեղահանման նախերգանքն է:
Իսրայելցի և պաղեստինցի վերլուծաբանները նաև նախազգուշացրել են, որ Իսրայելի կառավարությունը, հավանաբար, ձգտում է բորբոքել հակամարտությունը՝ Եգիպտոսի դեմ հանրային կարծիքն ուղղելու ծրագրի շրջանակում, ինչպես Գազայում էթնիկ զտումները հեշտացնելու, այնպես էլ Իսրայելի ավելի լայն տարածաշրջանային ռազմավարական նկրտումներն առաջ տանելու համար:
Այս շաբաթվա սկզբին իսրայելական լրատվամիջոցները հայտնել էին, որ Եգիպտոսը մեծացրել է իր ռազմական ներկայությունը Գազային սահմանակից Սինայի թերակղզու հյուսիսում զորքեր մտցնելու թույլատրված քանակից ավելի, ինչպես նաև նոր ենթակառուցվածք է կառուցել նավահանգիստներում և օդային բազաներում:
Իսրայելի պաշտոնյաները հայտնել են, որ այս հարցերը քննարկվել են Կահիրեի և Վաշինգտոնի հետ, իսկ պաշտպանության նախարար Իսրայել Կացը հինգշաբթի հայտարարել է, որ Իսրայելը թույլ չի տա Եգիպտոսին խախտել 1979 թվականի Քեմփ Դևիդի համաձայնագիրը: Բայց եգիպտացի նախկին բարձրաստիճան սպան Middle East Eye-ին հայտնել է, որ խախտումներ չկան և նշել, որ զորքերի ներկայիս քանակը և այլ ռազմական գործողությունները համապատասխանում են սկզբնական պայմանագրին և հաջորդած ուղղումներին:
